《毒L和初戀相識的日子》: 第十五章 位置

第十五章 位置

「你地三個男人喺廁所搞咩咁耐？」Winnie喺巴士上問我。

「冇，傾吓計姐。」

「咁多計傾嘅你地。傾咩先？」Winnie好奇地問。

「都係傾吓打機啲嘢，哈哈。」



冇理由話我又比佢地串㗎...

「又掛住打機，你心入面排第一嘅係打機？」

「緊係唔係，學業，家人，朋友戈D緊要啲。」

「咁都好啲，不過你都唔好咁沉迷打機喇。」Winnie好認真咁同我講。

「嗯。知道喇。」我點頭回應。



喺番緊入屯門嘅車程入面，我不斷沉思緊Winnie喺我心入面嘅角色同埋位置。

「其實你當人傻㗎咩，人地擺明都feel倒。」突然諗起今朝晴晴同我講嘅呢句說話。

其實我真係對Winnie有好感，不過一直都冇同人講。由幾時開始㗎呢？大約係同佢第一次食譚仔之後啦，加埋同佢相處嘅過程。不過，冇理由識咗咁短時間就話中意人掛。

依家過咗一個月，如果表白，最壞嘅情況係大家會變為陌生人，加上我又唔知佢點諗。所以呢啲嘢都係睇定啲先。

「唉。」我忍唔住嘆氣了一聲。



「做咩嘆氣阿你？」

「冇阿，好攰嘛今日番咁早。」

「我都好攰呀。」

眨吓眼，巴士已經到市中心。

「聽日兩點堂，我地一齊食lunch，之後先番去啦，男班長。」Winnie同我講。

「好。不如今次食茶記？」我主動問。

「好呀，去地下間譚仔斜對面戈間茶記，ok？」

「嗯，就咁決定啦。」



「咁十一點半門口等啦。」

「好。」

落車之後，我地入咗商埸，之後再喺老麥出面分開。

「聽日見喇，男班長。」

「好，聽日見。」










究竟我喺你心入面佔咩位置？