《毒L和初戀相識的日子》: 第十四章 優點(下)

第十四章 優點(下)

「下一位有請王泳琪同學。」

班上傳來更熱烈嘅歡呼聲同拍手聲。

「大家好，我係Winnie。我抽倒嘅人係男班長，Joseph。」

「我覺得男班長有好多優點。首先守時啦，呢樣嘢對第時番工好重要。」



「仲有細心啦，會關心身邊嘅人嘅習慣。喺我識嘅人入面，好少人會咁細心。」

「同埋充滿正能量啦，佢好多嘢都會睇得正面同樂觀面對。」

「至於值得學習嘅地方，頭先話佢睇嘢好樂觀，而我自己就睇事比較負面一啲，呢樣嘢係我要向男班長學習。」

「多謝大家。」

班上嘅人再次大聲地拍手同熱烈地歡呼。



「總結一下先，希望大家今日透過呢個遊戲可以加深對自己同埋其他人嘅了解啦。有功課嘅，就係番去打一篇文，內容係你地頭先出嚟講嘅嘢，不少於300字，用英文打，下星期交。」Billy sir對全班講。

「如果大家冇問題，今日去到呢度。」

落堂之後，我同Winnie都分別要去廁所，再一齊走。而喺廁所，我撞倒阿Paul同阿俊。

「Joseph哥，人地讚你讚到出哂面喇。」Paul奸笑咁對我講。

「咪係囉，人地比哂signal你喇。」阿俊和應。



「我都唔知你地講緊乜。」我無耐地回應。

「蘇州過後就冇艇撘，自己諗吓啦。」Paul回應。

「你加油啦。」阿俊回應。

之後，我地三個一齊行出廁所，而Winnie, 晴晴，同Jenny已經喺出面等緊。




希望我正面、樂觀嘅態度可以感染倒妳啦。