第十八章 睇戲

話咁快今日已經係星期六,即係慶祝晴晴生日嘅日子。我約咗Winnie 兩點半喺市中心巴士總站等。

阿Paul同晴晴約咗我地四點朗豪坊等,睇戲、食飯、唱K直落。不過咁樣會唔會做咗電燈膽呢?

離遠見倒Winnie。嘩,今日佢明顯悉心打扮過。佢化咗個淡妝,淺啡色長髮,着咗一件淺藍色外套同牛仔褲,鞋就係Nike嘅白色運動鞋。

「做咩又望住人唔眨眼呀,男班長!」Winnie一埋嚟就咁講。



「靚女望多兩眼都唔得嘅?」

「哼,即係話我平時唔靚?」

「唔係呀,一樣咁靚。」

「哼,算你啦。」

「妳帶咗份禮物出嚟未?」



「帶左喇,上車啦!」

上車之後,我地坐咗上層左邊嘅位。

「一陣我諗住食飯先送份禮物比晴晴,你配合吓啦。」Winnie同我講。

「係嘅係嘅。」

「仲有,你知今晚玩通頂啦。唔準自己早走。」



「知喇,我都預咗聽朝先番去,夜鬼。」

「咩夜鬼呀,人地第一次出夜街昨。」

「睇唔出妳咁乖喎~」

「哼,廢事睬你呀。衰人」

「講笑昨,唔好嬲啦。」我雙手合十地講。

「我似咁小器咩?」Winnie啤住我咁對我講。

「緊係唔似啦。妳又大方,又靚女。」我回應。

「咁就差唔多~」Winnie面露笑容。



眨下眼已經出到去旺角。行到去朗豪坊地下,就見倒阿Paul同晴晴。

「生日快樂呀晴晴。」Winnie同晴晴講。

「生日快樂呀。」我對晴晴講。

「多謝你地。不過我有個壞消息同你地講。」

「咩壞消息?」Winnie問。

「我地頭先買戲飛,得番兩set雙連位,所以我地冇得一齊坐喇。」晴晴同我地講。

此時,阿Paul偷偷地向我打咗一吓眼色。



「唔緊要啦,分開坐都算一齊睇。」Winnie講。

「係囉。」我回應。

「咁我地上去喇。」

電影係新上映嘅《我的少女時代》。







初次同妳「單獨」睇戲,感覺好正。
已有 0 人追稿