《毒L和初戀相識的日子》: 第三十章 時機

第三十章 時機

喺行番去朗屏站搭車戈段路，我嘗試同Winnie講我嘅心底話。

「Winnie呀，我... 有啲嘢想同妳講。」我內心緊張地同佢講。

「好阿。你講。」Winnie回應。

我個心跳得好快，好緊張。



「不如番到屯門先講？」

我有啲淆底。

「你中意啦。」

搭鐵番到屯門，我地行咗去屯門公園嘅一張長櫈戈度坐。

「你有咩想同我講？慢慢講，唔洗心急。」Winnie好認真咁對我講。



我嘗試克服內心嘅恐懼，決定豁出去。

「王泳琪。」

「頂你做咩叫我全名。」

「我想同你講，其實，我...」

Winnie好冷靜咁望住我，聽住我講。



「我今日全人堂講嘅戈句嘢，係...」

我內心越嚟越緊張。

「係我嘅真... 心話。」

夜晚公園已經冇乜人行，寧靜嘅環境得番我同Winnie。

Winnie聽完之後，臉上露出甜美嘅笑容，雙手緊緊咁捉住我。

「陳旭祖！」

好似係Winnie第一次咁叫我。

「你聽住，其實我好早就已經知。我一直等你，比機會你。不過，我唔想迫你。前日你先話要了解多啲、相處多啲，今日咁快就已經準備好？你肯定係因為今日見倒我同David一齊行先驅使你咁做啦。」Winnie語重心長咁同我講。



「我唔想我地貿貿然開始，因為一定好易會散。我想等你真係準備好之後，我地先一齊。所以，我地暫時繼續依家咁樣先，好唔好阿，男班長？」

Winnie繼續雙手緊緊地捉住我，雙眼通紅。

「唔答人㗎？」

可能我個腦仲未load倒，畢竟係第一次有女仔同我講啲咁嘅嘢，所以我暫時都冇出聲。

「男班長？」

唔知點解內心有一種想喊出嚟嘅感覺。

「Winnie, 好啦，我明白喇。多謝妳。我地暫時keep住咁樣先啦。」我忍住睙同佢講。



Winnie用手掃我背脊嘗試安慰我。

「人地又唔係拒絕你，唔好唔開心啦。」Winnie對我講。

「我冇嘢阿。」我嘗試令Winnie安心。

「咁番屋企喇。見你今日咁勇敢，獎你送我番屋企啦，男班長。」Winnie笑住咁同我講。

我地由屯門公園行番去市中心，我發覺越行越近我住戈幢樓。唔通Winnie又係住呢度？





講嘢要捉緊時機。