《毒L和初戀相識的日子》: 第四十九章 部隊鍋

第四十九章 部隊鍋

我坐咗喺張電腦凳度瞓着咗，到我醒番戈時已經有陽光照射入間房度，而我身上披咗件外套。

而Winnie就喺張床瞓着咗。眼前Winnie瞓着咗嘅樣好迷人，不過我唔會諗衰嘢嘅。

我行出廳，發現老母已經出咗門口，佢留咗張字條比我話去打牌，好夜先番。果然好識做喎。

我再望吓個鐘，已經十一點半。今日係星期日，樓下個商場同食肆肯定又迫滿拖喼嘅大陸自由行旅客。為咗唔洗迫餐死，我決定煮一餐午飯比自己同Winnie食。



我刷完牙之後就去廚房睇吓有咩材料。我廚藝都唔多掂，不過煮吓公仔麵同埋煎隻蛋都難唔倒我嘅。

我打開雪櫃，見倒食材好有限。有一細盒雪藏牛肉、急凍餃子、一樽759買嘅泡菜、少量唐生菜同埋一包金菇。跟住望吓個櫃，罐頭就有兩罐午餐肉，同埋有幾個韓國牌子嘅公仔麵。

當睇倒呢啲材料，我有一個念頭，就係好出名嘅韓國部隊鍋。其實都係放哂啲嘢落個煲度煮熟，所以都難唔倒我。

當我煮好之後，就入房叫醒Winnie。

「起身喇，王泳琪。」我拍吓Winnie。



Winnie從睡夢中醒過來。

「頂你呀，又叫人全名。」Winnie慢慢地睜開眼。

「我煮咗啲嘢呀，妳去洗個面先啦。」我對Winnie講。

「好呀。」

Winnie梳洗之後就行咗去飯枱。



「嘩，好香喎。部隊鍋呀？」Winnie講。

「係呀，食啦，突登煮比妳㗎。」

「係咩？咁體貼呀，男班長。」

「對妳先係咁㗎昨。」

「多謝你。」Winnie用一個甜美嘅笑容回應。

食完之後，我去洗埋啲碗，Winnie就喺廳㩒電話。

「係喎，琴晚你未答我喎。」Winnie突然同我講。

「答咩呀，王泳琪？你指我地傾計戈時？」



「係呀，你未答人就瞓着咗。」Winnie失望地講。

我一啲印象都冇，可能當時真係太攰。

「Er... er... 妳問咗啲咩？」我唔知點答Winnie。

「算啦。都係冇嘢喇。」Winnie扁起嘴講。

我無奈地點點頭。

「Zoe啱啱搵我今晚食飯，你去唔去呀？」Winnie問。

「好呀，一齊去囉。」我回應。



「你去就好喇~ Zoe仲話琴日收倒男朋友份生日禮物，覺得好驚喜，你睇吓。」Winnie回應。

Winnie遞咗部電話比我睇，係一條親手織嘅頸巾。

「嘩，織一條頸巾要好比心機㗎喎。」我回應。

「Zoe就好啦，有個咁體貼嘅男朋友。唉，如果我都有就好喇。」Winnie啤住我咁講。

佢明顯係比緊說話我聽。

我內心掙扎咗好耐，決定鼓氣勇氣同Winnie講以下嘅嘢:










未拍過拖嘅人要出pool，膽量係不可缺乏嘅一樣嘢。可惜，呢樣嘢我非常缺乏。