《毒L和初戀相識的日子》: 第四十八章 酒醒

第四十八章 酒醒

「Winnie，你醒喇？」我由門口方向轉身對住Winnie。

「男班長？點解我會喺你間房嘅？」Winnie朦朦朧朧地問。

「妳頭先喺party room飲醉酒，之後阿俊佢地call我嚟接妳走。妳頭先差啲比人...」我回應。

「即係你送我番嚟㗎？」



「係呀，唔飲得又學人飲咁多酒！」我好嬲咁對Winnie講。

明明我自己啲酒量都唔得。

「唔好嬲啦，對唔住啦要你擔心。」Winnie好嗲咁講。

好似係第一次聽Winnie用呢種語氣同我講嘢，聽到我個心都軟哂。

「邊有嬲吖。係呢，妳洗唔洗落去換番件衫，沖個涼呀？」我問Winnie。



Winnie㩒緊部電話。唔知睇咩睇到好開心。

「我屋企冇人喎，不如你陪我落去再上番嚟？」Winnie問。

「唔好喇，咁妳落番去啦。我好眼瞓。」

「不過我想你今晚陪我喎。」

吓，我有冇聽錯...



我目定口呆咁企咗喺度。

「我係話想你陪我傾計呀，你諗咗去邊呀，男班長？」Winnie同我講。

「冇阿，咪傾計囉，哈哈。咁妳落去換件衫沖個涼先，上嚟戈時Whatsapp我，再開門比妳啦。」我回應。

「但係開兩次門會唔會嘈倒你屋企人呀？」Winnie問。

「放心啦，我老母地震都唔醒。」我回應。

「好啦，咁我落去喇，一陣見。」

「好。」

我入番房上吓網，已經好攰。大約一粒鐘之後，到凌晨四點半。Winnie Whatsapp叫我開門比佢，之後我開門比佢入嚟。



「等咗好耐呀？」Winnie問。

「唔係呀。」

不過我好眼瞓姐。

「入去囉，想同你傾吓計。」

「嗯。」

我地入咗房，我坐咗係張電腦凳度，而Winnie就坐咗喺張床度。

「男班長，你唔好諗衰嘢呀，人地想同你傾吓計先上番嚟。」Winnie同我講。



「咁妳想傾啲咩？」我打咗個喊路。

「今日真係好多謝你。頭先Zoe同我講哂成件事，我都記得番飲醉之前嘅嘢喇。」

「咁妳下次唔好再自己出去飲酒喇，擔心死人咩。」我回應。

「咩喎，我都唔知會有狗公㗎。戈個人係David個朋友，Zoe話以後有咩活動都唔會再叫佢㗎喇。」

世上狗公何其多，防得一個防倒兩個防唔防倒第三個？

「妳，下次帶埋我去啦。我唔放心。」

「吓，點解喎？」

「因為妳係我好重要嘅人。」我開始攰到睜唔開隻眼。



「算你啦~」

不知不覺，我已經喺張電腦凳度瞓着咗。








妳冇事就好。