《毒L和初戀相識的日子》: 第六十八章 新.關係

第六十八章 新.關係

人同人之間嘅關係好奇妙，有啲關係，係冇得揀，天注定的。例如父母、兄弟、姊妹、親戚等等。有得揀嘅，例如朋友、師生、同學、同事、鄰居、伴侶、男女朋友等等。每個人總會遇到同自己夾倒嘅朋友，亦都會遇到討厭嘅人。一段關係，係靠雙方去維繫。有啲關係，係可以改變的。同事之間可以變為朋友，朋友之間亦可以變為戀人。今日，我同Winnie嘅關係會唔會有所突破呢？

---12月8日---
---屯門某Party Room---

「等等先，喺切蛋糕之前，我有樣嘢想講呀~」我對大家講。

「你想講咩呀，男班長？」Winnie望向我。



此時，大家都靜咗。阿Paul同晴晴不約而同咁對我舉咗一個加油嘅手勢，而其他人都好認真咁望住我。

我鼓氣咗人生中最大嘅勇氣，講出以下嘅說話:「王泳琪，其實有啲嘢我已經想同妳講咗好耐。」

「咩呀，係就快啲講啦。」

「其實…… 我…… 我…… 中意咗妳好耐，好想…… 妳…… 做我…… 女朋友呀！」

我好緊張，心跳加速，同埋相信塊面已經好紅，雖然睇唔倒。



Winnie暫時仲係一言不發，只係眼甘甘咁望住我。而其他人都好專心咁望住我地，氣氛有啲緊張。

呢個時候，晴晴突然向我地講:「我地出去先喇，唔好阻住佢地啦。」

然後，阿Paul、晴晴、阿俊、Jenny、家怡、Chirsty、David同埋Zoe都暫時離開咗間房。

Winnie仲係唔出聲，而我開始有啲怯。有人話，如果表白失敗，分分鐘朋友都冇得做。莫非....

突然，Winnie行向我身前，攬住咗我。



「好呀，我等咗你呢句好耐喇。」

「你終於肯鼓起勇氣同我講喇咩，衰人。」

「咁今日就係我地嘅第一日喇~」Winnie好感觸咁對我講。

我聽完之後，覺得好開心，亦都鬆一口氣。

「嗯。我親愛嘅女朋友~」

「第一日就口花花~ 叫番佢地入嚟切蛋糕先啦！」

「係嘅，我即刻去。」



之後，佢地八個都入番嚟切蛋糕。我就比阿Paul同晴晴拉埋咗一邊。

「你搞成點？」阿Paul問。

當我想答嘅時候，晴晴已經出聲先。

「唔洗問啦，你睇吓Winnie個樣就知啦。」

Winnie臉上顯露出甜美嘅笑容。

「恭喜哂呀，Joseph哥。對人地好啲呀。」阿Paul講。

「你整喊Winnie或者對佢唔好嘅話，我唔會放過你㗎。」晴晴同我講。

「收倒哂。我一定會對Winnie好好。」我回應。



其他人掛住食蛋糕，完全冇留意我、阿Paul同晴晴。不過我估佢地已經知我成功咗。

「食蛋糕啦，男班長。」Winnie將一件放喺紙碟上嘅蛋糕遞向我，臉上帶有微笑。

「唔該妳喎~」我回應。

食完蛋糕之後，大家繼續玩，包括打牌、唱K同Board game。時間亦都好快嚟到夜晚十一點，落咗樓下之後，大家都要解散喇。我地行番去屯門站，阿Paul、晴晴、阿俊、Jenny、家怡、Chirsty都係搭西鐵走，而David同Zoe就行向新墟嘅方向番屋企。而我同Winnie就兩個人行番去市中心。

雖然我同Winnie嘅關係改變咗，不過我都認為自己對佢嘅了解未夠深。始終係初戀，我要喺將來嘅日子繼續一邊相處、了解以及更深入嘅同佢相識。








同Winnie嘅呢段新.關係，我會好好珍惜。