《毒L和初戀相識的日子》: 第六十九章 在一起

第六十九章 在一起

我同Winnie離開屯門站之後，經屯門公園行番去。一路上，我都好難為情，唔知講咩好。又係嘅，第一日喺埋一齊係緊張啲。而Winnie都好似好緊張咁。

講嘢都難為情，更加唔好話拖手之類。

為咗打破呢個氣氛，我決定主動開口講嘢。

「嚟緊sem break有咩搞呀？」我問Winnie。



「我要陪阿媽番大陸嘅親戚度，去兩個禮拜左右啦。」Winnie回應。

「吓，咁我地咪冇得見...」我失望地講。

「番嚟咪有得見囉，唔好又頹啦，男班長。」

「咁妳幾多號起程呀？」

「後日囉，29號番嚟。去中山呀。」



「唉，即係我地冇得一齊慶祝聖誕節囉......」

「咁等我番嚟先同你慶祝啦~ 唔一定要慶祝正日㗎嘛，係咪？」

其實無論幾時慶祝，我都冇所謂。

「嗯~ 咁我等妳番嚟喇喎。」

「咁你呢，sem break有咩做？」Winnie問。



「我呀，會番part time囉。應該番賣飲品嘅鋪頭。同埋做吓廢青啦。」

「幾好吖賺吓錢。我番嚟之後你要請我食嘢㗎。」

「一定會啦，妳係我女朋友嘛。」

「哼，成日都口花花~」

此時，我地已經到咗地下大堂。

「係喎，你番咗大陸我地咪冇得用Whatsapp聯絡囉。」我同Winnie講。

「係呀，Wechat我都冇，咁我地用sms或者打電話聯絡啦。」

竟然要用番00's 嘅方法... 不過冇計啦，大陸禁哂fb、Whatsapp之類嘅網站同app。



「好呀，橫掂我地同台，同埋月費都包一千個信息。」

Winnie有Lift先。

「我送埋妳去屋企門口啦。」我講。

「好呀。」

我地上到去。

「喂，男班長。」

「咩呀？」



「我入去喇喎。」

「嗯。」

「咁幾時再見呀？ 過咗聽日之後就要廿九號之後先見倒。」Winnie問。

而咁啱我聽日係中學嘅校友日，要番去全日。

「我聽日要番中學嘅校友日呀。咁... 唯有廿九號先見？」

「好啦咁。我真係入去喇。」

「嗯。咁我上番去喇。」

「好，電聯啦，拜拜喇男班長。」Winnie附上一個甜美嘅笑容。



「好啦，拜拜。」

就係咁，同Winnie慶祝生日就完滿結束喇。至於我同Winnie，亦都有突破性嘅進展。








同Winnie第一日拍拖，之後要過二十日先見。雖然見唔倒面，不過我地都會保持聯絡㗎嘛。即使相隔幾遠，我心裡都會同妳在一起。