第七十三章 海洋公園遊(下)

「我聽個電話先。」Winnie講。

佢行咗去好遠聽呢個電話,講咗大約五分鐘就行番嚟。

「邊個搵妳呀~?」我問。

「唔知呢~ 行囉我地,跟住想去邊度玩呀?」



「一路行吓先啦~」我回應。

沿住條路行,我地到咗「海洋劇場」。呢度係睇海豚同海獅,咁啱又撞正時間差唔多開始表演喇,所以我同Winnie決定入去睇。

睇完之後,我地再沿路行落去,搭咗兩轉電梯,就落到去「滑浪飛船」。

「我想玩呢個呀~」Winnie講。

我地去排隊,大約十五分鐘就有得玩喇。呢個遊戲係坐上㗎船,之後沿住水流一直漂,再上一條大斜路,然後再沿水流漂,去到一個位就衝番落去,亦都係呢個機動遊戲嘅高潮位。



喺衝落嚟嘅一刻,會有個鏡頭影玩家嘅相,喺完咗戈時可以幫佢買,產品包括有印咗幅相嘅鎖匙扣等等。

我同Winnie兩個人坐上架船,我坐前面,佢坐後面。然後就開船喇。

「我好緊張呀~」Winnie同我講。

「又係妳話要玩呢樣嘢嘅~」我回應。

「咁人地未試過想試吓吖嘛~」



話咁快㗎船已經上咗去,準備衝落去喇。

「我好驚呀~」Winnie講,並且雙手踏住咗我膊頭。

「呀~~~」我地都喺衝落去戈一刻一齊尖叫。

之後我地落船,行番出去就見倒個賣紀念品店個營幕影住我地張相。

「不如買兩個鎖匙扣吖~?」Winnie問。

「好呀~」我回應。

之後Winnie搶住去比錢。

「送比你吖~ 一人一個,我地專用嘅情侶裝鎖匙扣~」



「多謝妳喎~ 我一定會用~」

「算你啦。咁樣無論我去咗邊,你都可以見倒我啦。」

「吓,點解咁講嘅?」

「冇呀,行啦,睇吓仲去邊度玩。」

我地搭番登山電梯上去,再搭䌫車落山。巧合地當時冇乜人排隊,所以成部䌫車得我同Winnie。

「不如我地影番張自拍囉~」 Winnie講。

「好呀~」



Winnie揸住部電話,同我影咗好多張自拍。

眨吓眼已經落番山,我地去咗睇熊貓。樂樂、盈盈都分別喺入面。

我地都分別用電話影低。不過,Winnie不停望住兩隻熊貓,睇落好似有啲心事。

「做咩呀妳~?」我問Winnie。

「你話如果我地好似佢地咁,每日都可以見面,你話幾好呢~?」Winnie指住兩隻熊貓講。

「咁我地約出嚟約得密啲囉~」

「都可以嘅~」Winnie回應,並帶住一個帶有心事嘅表情。

最後一個節目,我地去咗「香港老大街」,入面有好經典嘅場景,包括舊街同店舖。我地都喺度影咗幾張自拍。



時間過得好快,公園都差唔多關門。我同Winnie行咗出去,決定食埋晚飯先番去。




其實,我都想我地每日都可以見面。
已有 0 人追稿