《毒L和初戀相識的日子》: 第七十二章 海洋公園遊(上)

第七十二章 海洋公園遊(上)

到咗第二日，我準時十點鐘喺樓下等Winnie。等咗幾分鐘佢就出現喇。

「好準時喎，男班長~」

「拍拖點可以遲到吖~」我回應。

「成日都口花花~」



我同Winnie拖住手行去搭巴士去到金鐘，再轉巴士去海洋公園正門。

到達之後，首先係去首票處買飛。由於今日係星期六，所以比較多人排隊。

買咗飛之後就入場喇。Winnie話想去山上玩先，所以我地就搭咗海洋列車上去。

我好細個戈時去過一次海洋公園，之後都冇去過。呢部海洋列車應該係新嘢嚟。

好快就已經到達山上，Winnie拖住我行，佢話想玩咗一樣嘢好耐。



「跟我嚟吖~」Winnie同我講。

我地到咗「動感快車」嘅排隊處。「動感快車」係海洋公園其中一部過山車。

「陪我玩呢個吖~」

我估唔到Winnie中意玩埋啲咁刺激嘅野。

「好呀~」



排咗半粒鐘左右終於到我地，放低咗個袋之後我地就登上咗呢部「動感快車」。

所有人都扣上安全帶之後，部車就慢慢開出喇。首先係轉上一條極斜嘅路軌，速度十分慢。上到頂之後，最刺激嘅一幕就出現喇。部車高速咁滑落去，轉急灣、旋轉三百六十度。

Winnie同我，什至車上嘅人都喺度尖叫，戈種離心力實在太大喇。

之後部車番到起點，我地拎番個袋離開。

「好爽呀~ 我都未玩過啲咁刺激嘅嘢。」Winnie對我講。

「哈哈，我都覺得好刺激~」

「刺激完之後，咁不如我地去睇吓企鵝吖~」

「好呀。」



我地行咗去隔離嘅「冰極天地」。入咗室內嘅「南極奇觀」，入面有好多企鵝，溫度都較到好凍，配合番適合企鵝生活嘅溫度。

「佢地好可愛呀~」Winnie講。

「咁我幫妳同佢地影張相吖~」

「好呀~ 影靚啲呀~」

影咗幾張相，Winnie話我都影得幾好。

之後我地出番去行，經過「橫衝直撞」(即係碰碰車)，Winnie突然停低。

「我想玩呢個呀。」Winnie講。



「咁咪玩囉~」

咁啱冇乜人排隊，等咗一round就有得玩喇。

我同Winnie分咗兩㗎車玩，每部車都限咗速，所以都冇刺激嘅感覺。

「都幾好玩吖~ 不如去食嘢咯~」Winnie講。

「好呀。」

正當我睇緊張地圖嘅時候，Winnie捉住我行。

「行啦，我識路呀~」

未嚟過嘅Winnie仲識路過我。



好快我地就到咗成個海洋公園最平嘅餐廳，老麥喇。

「我去叫嘢食先，妳坐低等我吖~」我對Winnie講。

「好呀，唔該哂你~」

我記得第一堂全人發展堂嘅「九官格」遊戲，Winnie表示過中意食豬柳蛋。而我就叫咗個雙層芝士孖堡，再加多包薯條同兩杯可樂。

「好醒喎你，咁都記得我中意食豬柳蛋~」Winnie喺我拎嘢食埋位戈陣講。

「緊係啦，妳嘅嘢我會特別記得~」

「算你啦，夠體貼喎~」



「食嘢啦~」

我地食完嘢之後，Winnie部電話突然響起......






同妳拍住拖咁去海洋公園，其實我都想咗好耐。