《毒L和初戀相識的日子》: 第八十三章 時間錦囊

第八十三章 時間錦囊

今日係番I大sem two嘅第二個星期，我同Winnie如常一齊番學。喺車程入面，Winnie提議咗一樣嘢。

「男班長呀，你有冇諗過十年之後嘅自己會係點㗎？」

「冇阿， 我冇諗到咁長遠呀。咁妳呢~？」

「我都唔知，我可能會做緊份長工啦~ 講返正題先，我想為大家做一樣嘢。」



「咩嘢~？」

「大家將自己對於十年之後嘅期望寫喺張紙嗰度，然後十年之後再攞返嚟睇~ 即係類似時間錦囊嘅嘢~」

「咦，咁都幾有趣喎~」

「咁一陣番到去同佢哋講囉~」

「嗯~ 但係點解妳突然間會有呢個諗法嘅~？」



「我早幾日上網睇咗套戲，入面有咁嘅情節，我睇完之後就覺得我地都可以咁做~」

「原來係咁~」

返到I大之後，Winnie將佢個提議講畀大家聽，包括有阿Paul、晴晴、阿俊、Jenny、家怡同埋Christy。

「都幾好玩喎呢件事~」阿Paul聽完之後回應。

「係呀，仲好有意義添~」晴晴回應。



「Good idea啦。我都想做呢樣嘢好耐~」家怡回應。

大家都好贊同呢樣嘢。於是，Winnie將已經準備好嘅紙條派畀大家去寫。

「大家寫完就摺埋張紙放落呢個樽度啦。」Winnie向大家講。

「十年後對自己嘅期望...... 究竟寫乜好呢...」我心想。

Winnie好快已經寫完喇，而晴晴、Jenny、家怡、Christy 都先後寫完。

我最後決定咁寫: 希望十年後嘅自己有一份人工高又穩定嘅工作，同埋最重要嘅就梗係可以同Winnie好幸福咁喺埋一齊~

寫完之後，我接埋張紙就放埋落個樽度啦。

而阿俊同阿Paul亦都寫完。



「個樽我會keep好~ 咁我約實大家，10年之後嘅今日， 約出嚟一齊開返嚟睇下大家究竟寫咗啲咩畀自己吖~」Winnie對大家講。

「即係2026年嘅1月25號~ 到時大家一定要出現呀~」晴晴對大家講。

大家都點頭同意，唔知到時出現嘅會有幾多個人呢......

呢個時候就開始上堂啦。喺放break嗰時， 我如常落去部汽水機買盒朱奶畀Winnie飲。

「多謝你呀，男班長~」Winnie笑住咁同我講。

「洗咩客氣吖，我地咁熟~」我回應。

到咗放學之後，我又如常同Winnie一齊搭車返去。 喺車程入面，我出於好奇咁問咗Winnie一個問題。



「不如開個樽睇下佢哋寫咗啲咩囉~？」

「梗係唔得啦，要睇嘅都只可以十年之後先開返嚟睇。唔可以咁樣偷睇人哋啲嘢㗎。」Winnie認真地向我講。

「好嘅，收倒喇~」我回應。

「算你啦~」




唔知妳寫咗啲咩呢~