《毒L和初戀相識的日子》: 第八十四章 火警演習

第八十四章 火警演習

今日係Sem two嘅 week two嘅星期二，番下晝一半至四半。我同Winnie約咗阿Paul同晴晴一齊食lunch，之後再番I大上堂。

我地約咗去瀝源邨嘅一間茶記度食嘢。比起I大 canteen嘅頹飯，如果有得揀嘅話，多數都會揀出去外面食。

我地約咗十一點半喺沙田火車站等，再一齊行過去。不過，我同Winnie早到咗。於是，我地傾住計咁打發時間。

「男班長呀，之前咪同你講過我個friend嚟緊九月要去台灣讀書，不過佢仲未同佢男朋友講嘅~？」Winnie同我講。



「嗯，我記得呀。咁之後點？妳個friend決定點？」

「佢經過深思熟慮之後，決定如實咁同佢男朋友講。佢地早兩日約咗出嚟講，不過......」

「不過咩...?」

「佢男朋友話接受唔倒佢地兩個要分開咁耐，之後講吓講吓就炒大獲... 依家佢地互相都冇搵過對方...」

「唔係掛...」



「唉，呢件事我都好無耐呀......」

「唔好講呢啲喇~ 係呢，妳嚟緊新年洗唔洗番大陸呀~？」

「要阿... 要番去拜年~」

「咁我地到時咪又冇得見...」我故意扁起嘴。

「我地依家幾乎日日都見㗎啦，你唔悶㗎咩~？」



「緊係唔悶啦，對住妳又點會悶吖~」

「成日都口花花~」Winnie忍住笑咁講。

此時，阿Paul同晴晴嚟到喇。

「你地傾乜傾得咁開心呀？成日都喺度放閃~」晴晴問。

「邊有喎... 我地行囉。」我回應。

Winnie冇出聲，不過喺度偷笑。

我地行咗大約十幾分鐘就去到戈間茶餐廳。

一到午飯繁忙時間，餐廳入面就會人山人海。我地叫咗四個餐，食完就走喇。



番到I大，今日係上英文堂，係一個叫Miss Yip嘅中年miss教我地。

上堂上到中途，火警鐘突然響起。

「Today we have a fire drill in our school. Please go to the ground floor and wait.」Miss Yip對全班講。

我地全班有跌序咁行落地下集合同報到。

「原來I大都有火警演習，仲以為中小學先有添。」阿Paul講。

「係囉，我都估唔到呀~」晴晴回應。

大家都喺度等緊其他班嘅人落嚟，而Winnie就好專心咁睇緊部電話。



「睇緊咩呀~？」我好奇地問Winnie。

「冇呀，唔好咁八卦啦，男班長~」Winnie回應。

大約十五分鐘之後，我地重新上番去課室，繼續上堂。




好多事都可以預先演習一次，不過總係有啲事係唔可能預演一次嘅......