《毒L和初戀相識的日子》: 第九十二章 體貼

第九十二章 體貼

到第二日係星期二，又係上英文堂嘅日子，時間係一半到四半。

今日氣溫得十幾度，係好易令人患上感冒嘅天氣，而Winnie亦都不幸中咗招。

今日如常約Winnie一齊番學，約咗十二點喺樓下等。不過，佢今日戴咗一個口罩，睇得出佢病咗。

「妳病咗都仲番學？」我一見面就問Winnie。



「我冇嘢喎，少少感冒咋嘛~ 琴晚食完B仔返嚟就開始病病地，可能冷親啦。」Winnie把聲有少少沙咁同我講。

「你唔好死頂喎...」

「得啦，行啦~」

「咁你食咗藥未呀...？」

「未呀，屋企搵嚟搵去都冇感冒藥。 諗住一陣去買呀。」



「咁你等我一陣啦...」

我番上屋企拎咗一排感冒藥，再攞落去比Winnie。

「你食咗先啦，呢隻藥無睡意㗎。」我對Winnie講。

「唔該你呀，男班長~」Winnie回應。

佢喺個袋拎咗個水樽出嚟去食藥。



「好喇我哋行啦，再唔行就遲到㗎喇。」Winnie講。

喺車上面，Winnie全程都貼住我個膊頭瞓覺。直到差唔多落車，我先叫醒佢。

番到I大之後，Winnie都係僕咗喺張枱度休息。我有少少後悔，一開始應該叫佢留喺屋企好好休息。

「Winnie病咗呀？」坐隔離嘅阿俊問。

「係呀，佢感冒。呢啲天氣好易病。」我回應。

「好好照顧人哋喇~」坐前面嘅Christy擰轉頭同我講。

「得啦~」我回應。

「病咗仲番嚟嘅~？」坐前面嘅家怡問。



「佢堅持要番呀...」我回應。

到落堂之後，我叫醒Winnie。佢休息咗之後，神色稍為好返啲。

「吓，落咗堂㗎啦？」Winnie問。

「係呀，妳瞓足全堂。」我回應。

「咁走喇~」

我地離開I大，行番去搭車番去。喺車上，Winnie又再瞓過。

落車之後，我地行番去屋企樓下。



「妳呀，一陣食多次藥，同埋食啲清淡啲嘅嘢。如果未好番，聽日就唔好番學喇。」我叮囑Winnie，同埋將成排感冒藥比佢。

「嗯，多謝你呀，你好體貼呀，男班長~」

我送埋Winnie去佢屋企門口。

「我上去先喇，有咩Whatsapp再傾啦~」我同Winnie講。

「好啦，拜拜~」

「拜拜~」








其實每個人都會有體貼別人嘅一面，特別係對自己中意嘅人。