《毒L和初戀相識的日子》: 第九十七章 嘗試

第九十七章 嘗試

「點阿，上唔上嚟我度食飯呀~？」Winnie喺屋企樓下問我。

「上囉~」我爽快地回答。

Winnie聽完我個答案，臉上露出一個好甜美嘅笑容。

「咁我地上去啦~」



我認同阿Paul嘅睇法，冇理由唔比面伯母啦。不過，我心情好緊張。雖然係咁，我都決定嘗試吓。

「等等先，話哂第一次見面，洗唔洗買啲嘢上去呀？」我問Winnie。

「唔洗啦~ 我阿媽先唔會計較呢啲嘢~ 你個人出現就得㗎喇~」Winnie回答。

於是，我同Winnie仲有Tommy一齊上去佢屋企。

踏進升降機入面，當越接近九樓，我個心就越緊張。



「你唔使咁緊張㗎喎，我呀媽係個好隨和嘅人。」Winnie同我講。

「好啦~」我回應。

到咗九樓之後，我地行到去Winnie單位嘅鐵閘前。Winnie拎條鎖匙出嚟開鐵閘同開門。

「你喺度等我一陣先啦~」Winnie同我講。

「好呀~」我回應。



Winnie同Tommy首先入咗去。等咗半分鐘左右，Winnie出番嚟。

「你可以入嚟喇，男班長~」

我除低對鞋喺屋出面，Winnie拎咗一對拖鞋比我，我即刻着上。

伯母呢個時候喺廚房煮緊飯，Winnie示意我入去同佢打聲招呼。

「你好呀，伯母。」

「出去坐吓先啦，好快有得食㗎喇~」伯母同我講。

我出咗去廳嘅飯枱坐低。Winnie喺度㩒電話，而Tommy就睇電視。好彩有個細路Tommy喺度，氣氛先冇咁尷尬。

「洗唔洗幫手拎嘢~？」我問Winnie。



「唔洗啦，你係客人，坐低等食就得喇~」Winnie回應。

大約十分鐘之後，伯母拎咗三個餸出嚟，包括有生炒排骨、蝦仁炒蛋同埋蒜蓉炒菜心。

當伯母拎埋幾碗白飯出嚟之後，我地四個人坐低喺飯枱前。

「大家起筷啦~」伯母對我地講。

當大家都差唔多食完嘅時候，伯母問咗我一個問題:「覺得啲嘢好唔好食呀？」

「幾好食呀~」我回應。

「得閒咪落嚟食吓囉~ 隨時都歡迎你㗎。」



「好呀，多謝你。」我回應。

大家都食完之後，Winnie同伯母拎啲碗碟去廚房洗。過咗幾分鐘，Winnie出番嚟先。

「咁我走喇~」我同Winnie講。

「我送你吖~」Winnie回應。

「好啦~」

「伯母，我走先喇，拜拜~」我去廚房同伯母講。

「拜拜，下次再嚟啦。」

我同Winnie行出屋外。



「我上番去先喇，咁聽朝番學見喇喎~」

「好啦。今日多謝你陪我湊細路阿~」Winnie突然捉住我隻手同我講。

「洗... 洗乜客氣吖，妳係我女朋友嚟㗎嘛~」我有啲怕羞咁回應。

突然，Winnie錫咗我塊面一吓。一時之間，我都比唔倒任何反應。

「聽日見啦，男班長~」

「好... 好啦，拜拜~」







第一次去見伯母呢個嘗試，都算係一件幾特別嘅事。