《毒L和初戀相識的日子》: 第九十八章 發揮

第九十八章 發揮

我同Winnie係班上嘅男、女班長，一直以來都冇嘢比我地做，除咗sem one嘅開sem飯係梁sir叫我地做搞手。不過，今日終於可以為我地班做番啲嘢，可以比我地發揮。

今日係week 6嘅星期一，朝早上梁sir堂。我同Winnie如常一齊番學，仲早到咗添。我地照坐窗邊最後一排嘅二人位。

梁sir一入班房就叫咗我同Winnie出去。

「兩位班長麻煩出一出嚟吖。」梁sir開咪同我地講。



我同Winnie一齊出去，唔知佢搵我地做咩呢。

「今日晏晝五點有個會要開，你地兩個要代表我地班出席。到時院長會喺度嘅，主要係講番你地同學對學校設施、環境同埋每一科有冇咩意見等等。你地得閒出席㗎嘛？」梁sir同我地講。

「得閒~」我同Winnie同時回應。

「咁辛苦你地喇！」

由於上晝上完堂之後要留到五點，所以我同Winnie有一大段時間空咗出嚟。



「咁我地呢四個幾鐘去邊好呀~？」Winnie喺放break戈陣問我。

「妳有冇戲想睇呀~？」我問Winnie。

「等我上網睇吓最近有咩戲上映先~」Winnie回應。

「睇《冰天血地八惡人》囉~ 早兩日我同咗個朋友去睇，都ok好睇㗎~」家怡突然喺前面擰轉頭同我地講。

「同邊個睇呀~？」同樣坐前面嘅Christy問。



「唔知呢~」家怡回應。

其實，佢唔講我地都知戈位「朋友」係邊個啦。

於是，Winnie上網search吓呢套戲，原來係美國片，主要係講美國南北戰爭之後喺暴風雪期間八個西部人嘅故事。

「咁妳有冇與趣呀~」我問Winnie。

「冇所謂呀。睇1:45pm戈場囉~？」

「好呀~」

我地十二點半落堂，去咗瀝源邨一間荼記食飯，之後就直接去新城市戈間戲院買飛睇戲。

套戲兩個半鐘多啲，可以話都幾抵睇，不過劇情方面呢就....... 真係不予置評喇，可能呢類型嘅戲唔啱我睇啦。至於Winnie，佢就全神貫注咁睇哂成套戲。



睇完戲之後，番到I大就開會喇。會議期間我同Winnie都冇乜發言，因為我地對學校設施、環境等等都冇乜意見。唯一有講嘅係希望可以換吓課室啲枱凳，因為實在太舊喇。

開到六點幾就開完喇。我同Winnie一齊番去。

「我聽日走堂，要同我阿媽做啲嘢。咁後日先見喇喎~？」Winnie喺車上同我講。

「好啦，我幫妳拎notes啦。」我回應。

「唔該你呀，男班長~」








今日終於有比我地呢兩個班長「發揮」嘅機會。