《毒L和初戀相識的日子》: 第一百零四章 建造城市(下)

第一百零四章 建造城市(下)

我同Winnie離開咗呢間房，上咗去121號課室，入面冇人不過開咗燈。我地除咗見倒有兩張地圖之外，仲見倒有兩部搖控車。

「你有冇玩過呢個遊戲呀~？」Winnie問我。

「冇呀~」我回應。

「好似幾好玩咁喎~」



「係囉~」

「咦，做咩有兩部搖控車嘅？」

「係喎，佢啱啱都冇講過有㗎。」

Winnie拎咗部搖控車嚟玩。

「一陣妳玩到冇哂電就好笑~」我對Winnie講。



「如果係都入你數呀！」Winnie打咗我一下。

等咗一排，都未有人透過個對講機搵我地。

「男班長呀，其實呢...」Winnie突然將塊面越貼越近。

「做... 做咩？」我緊張地問。

「你有條頭髮喺條頸度呀，幫你整走咗喇！你又諗埋啲咩衰嘢呀~？」



「我邊有呀~」

「冇你咁好氣呀！」

我地再等，㩒電話㩒咗好耐，部對講機終於有反應喇。

(calling市長... 收唔收倒？) Winnie部對講機響起了。

我戈部對講機亦都響起，就咁聽把聲認唔出對方係邊個。

經過幾輪嘅對答，我同Winnie又再繼續等。喺呢個得我地兩個人嘅班房入面，唔知點解有一種好特別嘅感覺。

「男班長呀，一陣放學陪唔陪我出旺角買嘢，之後食埋飯~？」Winnie問我。

「好呀~」我回應。



隔咗一陣，對講機再次響起。

(你地可以落番嚟喇，記得拎埋兩部搖控車喎。) Billy sir透過對講機同我地講。

我地拎埋兩部搖控車，行番落地下戈間活動房。入到去，我地見倒有兩個用紙舖喺地下所做嘅「城市」，中間係有條馬路嘅。

「咁有請兩位市長進行埋『通車儀式』啦。」Billy sir對我地講。

我同Winnie各自將搖控車駛過自己組所整嘅城市，亦都代表呢個遊戲已經到尾聲喇。

當Billy sir睇過兩組嘅作品之後，就宣布賽果喇。

「好喇，我依家宣布兩組打和。咁麻煩大家走之前幫手執一執嘢先。」Billy sir講。



全班人都幫手執乾淨個場，所以好快搞掂喇。

「我地下一堂番嚟會同大家傾番份proposal，所以記住要出現呀。溫馨提示，未交proposal嘅記得五點半之前放去我個功課箱。最後祝大家週末愉快啦，拜拜。」

就係咁，今日全人堂呢場遊戲就玩完喇。放學戈陣，我同Winnie同埋阿俊、Jenny一齊行去火車站。






或者，喺呢個遊戲入面，市長嘅角色係最好做嘅。