《毒L和初戀相識的日子》: 第一百零五章 課後約會

第一百零五章 課後約會

「你地覺得啱啱個遊戲點~？」阿俊喺行去火車站途中問我地。

「冇乜嘢吖。」Jenny回應。

「都幾好玩吖~」Winnie回應。

「係囉。咁你地做咩角色？」我回應。



「都係『工人』囉。兩組嘅主管分別係阿明同埋阿安做。」阿俊回應。

阿明係全班身高最高嘅男仔，有個女朋友，不過去咗澳洲Working holiday。而阿安係班入面比較少講嘢嘅男仔，啱啱遊戲戈陣用對講機就係同佢對答，佢都有個比佢細一年嘅女朋友。不過，我同佢地兩個都唔太熟。

「你地兩個就好啦，玩遊戲都可以兩個人走咗去~」阿俊補充。

我一時之間唔知點應佢，而Winnie就喺度偷笑。

「你唔好玩佢地啦。係呢，你地一陣去邊呀？」Jenny問。



「我地去旺角買嘢呀。」我回應。

「咁咪幾好囉~」阿俊講。

我地四個去到火車站，搭到去九龍塘站轉車。

「我地搭呢個方向呀。咁星期一見啦，拜拜。」阿俊同我地兩個講。

「拜拜。」我同Winnie回應。



阿俊佢地行去調景嶺方向嘅月台，而我同Winnie係去油麻地方向嘅月台。我地兩個坐多三個站去到旺角。

「其實妳想買啲咩呢~？」我問。

「你跟住嚟咪知囉~」Winnie回應。

我地喺E2出口上番地面，行到去豉油街附近一間商場。上咗一層，Winnie帶咗我去一間賣袋同埋背囊嘅舖頭。

Winnie買咗兩個黑色行李袋。

「妳去旅行咩~？」我問Winnie。

「唔係喎~ 我幫屋企人買咋嘛。」

「吓，伯母要去旅行咩？」



「你唔好咁八卦啦，去食嘢囉我地。」

唔知點解，我直覺覺得佢隱暪緊一啲嘢。

「妳想食咩呀~？」

「冇所謂啦，你比啲主見啦，男班長~」

「咁去行吓先啦~」

「好啦。」

「幫妳拎嘢喇~」



「唔該哂你~」

夜晚七點幾嘅彌敦道人山人海。我地手拖手周圍行，最終行咗去金雞廣場附近一間食日本嘢嘅餐廳。





點解妳會突然間買兩個旅行袋呢...?