《毒L和初戀相識的日子》: 第一百二十一章 聚會

第一百二十一章 聚會

「星期日得唔得閒陪我去一個地方~？」Winnie問。

「得閒呀~ 妳想去邊？」我問。

「到時你咪知囉~」

我同Winnie喺沙田火車站外解散，佢番屋企，而我就約咗好耐冇見嘅中學同學Leo喺元朗食飯。



我約咗Leo喺大馬路間馬會等，去附近嘅一間酒樓打邊爐。我離遠已經見倒佢。

「好耐冇見喇。」Leo對我講。

「係呀，行喇。」

我地行到去附近嘅一間酒樓，坐低之後叫咗個沙嗲湯底。

「最近點呀？聽講你之前同你女朋友去咗台灣旅行喎。」我問。



「係呀，去咗台北玩。我都聽講你最近同人地去咗長洲喎。」

「一大班人去㗎。咁睇嚟我地啲愛情運都幾好。」

「我地就係，不過阿Ben就惨啲...」Leo回應。

「佢做咩？」

「佢之前識咗個女朋友，大約一個月就分咗手，因為個女仔講咗好多個大話去呃佢。」



「咁佢有冇唔開心？」

「之前約咗佢食飯，佢已經睇開咗。」

「咁都好啲。咁阿John最近點~？」

「佢讀緊HKU SPACE，聽講識咗個同科嘅女仔~ 不過我都好耐冇約佢食飯喇。」

「咁遲啲再約囉。」

呢個時候，個湯底已經嚟到。我地之後都係傾一啲打機嘅話題。

大約兩粒鐘之後就食完，我地行去西鐵站解散。

「咁下次再見啦，拜拜。」



「拜拜。」




雖然大家都好忙，不過間唔中都要出嚟聚一聚。