《毒L和初戀相識的日子》: 第一百二十二章 赤柱遊

第一百二十二章 赤柱遊

過咗一日，今日係星期日，Winnie約咗我十點喺屋企樓下等，佢話想去一個地方。

我地搭巴士出中環，再轉巴士入赤柱。原來，佢想去嘅地方係赤柱。

赤柱係香港島南面嘅海岸小鎮，亦都係旅遊勝地。不過，車程都要用上兩個鐘。

我地喺赤柱廣場嘅巴士站落車，行落去就見倒由好多唔同特色嘅小攤檔同埋商店組成嘅赤柱市集。



有好多商品都可以喺度搵倒，例如T-shirt、手飾同埋紀念品等等，價錢偏貴，始終呢度係遊客區。

我地喺人來人往嘅市集入面手拖手慢慢行，周圍睇吓嘢。

「有冇嘢想買阿~？」我問Winnie。

「睇吓先啦~」

喺其中一間攤檔，Winnie睇中咗一條手鏈，我毫不猶疑咁送比佢。



呢份好似係我第二份送比佢嘅禮物。

我親手幫Winnie戴上呢條手鏈。

「多謝你呀，男班長~」

「洗乜客氣吖~」

我地再行咗個幾鐘，之後到隔離嘅赤柱廣場食嘢。我地經過赤柱大街，右邊係有幾間特色餐廳、酒吧同露天茶座，而左邊就係平靜嘅海岸。我地見倒有好多遊客喺度食嘢。



去到廣場，入面有唔少餐廳，大部份都係連鎖店。

我地食完嘢之後落咗去海邊戈度行，吹住海風，仲自拍咗幾張添。一路上亦都見倒唔少外國遊客，氣氛好熱鬧。我地仲行咗去附近嘅卜公碼頭戈度影相，上蓋設計好有特色。

之後，我地亦都去咗美利樓行。呢幢建築原本係位於中環花園道，後來喺一九八二年拆卸。不過，拆卸出嚟嘅三千幾塊花崗岩都得以補留以及編上咗號碼，方便日後重建。直到一九九八年，美利樓正式喺赤柱重新展現。

位於海邊嘅美利樓入面有兩間餐廳同埋小部份商店，仲有小部份打卡位，我地都喺度自拍咗幾張。

話咁快時間已經去到四點幾，我地懷住不捨嘅心情離開呢個悠閒舒適嘅地方。

「點解想嚟呢度玩嘅~？」我喺回程嘅車程上問Winnie。

「想同你去吓多啲唔同嘅地方吖嘛~」Winnie回應。








間唔中同妳去吓街，可以促進我地之間嘅關係。