《毒L和初戀相識的日子》: 第一百二十四章 飯聚

第一百二十四章 飯聚

話咁快今日已經係星期五，亦都係復活節假期，我地約咗夜晚七點半喺佐敦莊士倫敦廣場嘅一間日式放題店食嘢。之後就去唱K。

Winnie話有嘢做，會自己去，所以我地直接約咗喺戈度嘅地下等。我早咗十五分鐘到達，見倒阿Paul、晴晴同埋Christy已經到咗。

「得你一個嘅~？」晴晴問我。

「係呀~ 佢話有嘢做喎，應該嚟緊。」我回應。



「係咪book咗位喇~？」Christy問。

「係呀，總共十個嘛~」晴晴回應。

「Joseph哥，一陣飲唔飲酒呀~？」阿Paul問。

諗番上次嘅經歷，我仍然歷歷在目。

「我勸你都係唔好飲喇...」我回應。



「咪係囉！唔準飲呀！」晴晴向阿Paul講。

「知喇......」阿Paul無奈地回應。

隔咗一陣，家怡同阿文都嚟到。

「Hey guys，同你地介紹吖，佢係阿文呀。我個好朋友。」家怡對大家講。

「大家好。我... 我叫阿文。」阿文對大家講。



「真係淨係好朋友~？」Christy問。

「唔知呢~？」家怡笑笑口咁回應。

「我地明㗎喇~」晴晴回應。

之後，阿俊拖住Jenny隻手行到過嚟。

「洗唔洗咁sweet呀你地兩個~？」晴晴問。

「咩喎~」阿俊回應。

「齊人未呀~？」Jenny問。

「仲差Winnie同Zoe呀。」晴晴回應。



望望電話，時間去到七點二十六分。

「Joseph哥，打比人啦！」阿Paul同我講。

「嗯，好啦。」我回應。

「咁我打比Zoe喇。」阿俊回應。

呢度同Zoe比較熟嘅除咗我就得阿俊，因為Zoe同David係男女朋友，而阿俊同David係好熟嘅中學同學。

正當我想打比Winnie嘅時候，佢Whatsapp咗我話會遲啲到，叫我地上去先。

平時Winnie好少會遲到㗎，佢搞咩呢......



「Zoe話五分鐘內到。」阿俊講。

「Winnie叫我地上去先，佢遲啲到喎。」我對大家講。

隔咗一陣，Zoe都到埋之後我地一齊上去。

上到去我地坐咗去一個角落嘅一張正方形大枱，枱其中三邊係坐位，而另外一邊係上菜位。

坐我左邊嘅係阿俊，右邊嘅係Zoe。

呢間放題除咗飲品同埋少量甜品之外，全部食物都係劃單任叫嘅，限時兩個鐘。阿Paul、晴晴佢地拎咗啲紙去劃，期間都有問吓我地想叫咩食。

家怡、阿文、Christy同埋阿俊出咗去幫我地拎嘢飲，好快就番嚟喇。

「你覺唔覺Winnie最近有啲唔妥？」Zoe突然細細聲問我。



我將上星期戈件事同咗Zoe講。

「我都知佢屋企出咗問題，不過一直以嚟佢都冇表現出嚟。其實啱啱今朝發生咗件事，我覺得要比你知，佢...」Zoe繼續細細聲同我講。

「唔好意思呀，我嚟遲咗~」Winnie突然出現。

「唔緊要啦，都未叫嘢食~」晴晴回應。

之後Zoe比咗個位Winnie坐，佢坐Winnie右邊。

阿俊、Jenny、家怡、阿文同Christy都分別做緊同一樣嘢，就係㩒電話。而阿Paul、晴晴喺度點餐，Winnie同Zoe傾緊計。

「齊人喇，咁不如我地玩一個遊戲吖~」晴晴喺落咗嘢食之後向我地提議。








唔知係玩咩遊戲呢？