《毒L和初戀相識的日子》: 第一百三十九章 新.開學日

第一百三十九章 新.開學日

話咁快今日已經係九月一號，正式成為Year 2嘅HD學生。讀埋今年，如果冇一科炒嘅話就會畢業。

今年班上得番二十六人，繼Winnie之後有三個人quit咗，三個都係男仔，我唔太熟嘅。

今日番下畫一點半，同舊年一樣，又係梁sir做我地班主任。佢講咗少少開場白就開始選班長喇。

「今年都要選兩個班長，一男一女。有冇人反對陳旭祖同學繼續做㗎？」梁sir問全班。



班上冇人出聲。

「咁有請陳旭祖同學出嚟。至於女班長，王泳琪同學早排已經冇讀喇，咁我地要選一個新嘅。有冇人想做㗎？」

令我驚訝嘅係，竟然有人舉手。

「我想做呀。」一把熟番嘅女仔聲從坐位中叫出來。

「好，咁有請呢位同學出嚟。」



「大家比啲掌聲我地今年嘅男女班長。」

(拍拍拍拍拍...)

其實我唔明點解佢會主動提出做女班長。

之後就開始上堂喇。放break戈時，我自己落去汽水機買咗盒朱奶飲，可以話係睹物思人啦。

不過，依家科技咁發達，我即刻send咗張相比Winnie。



我傳送了一個信息
「如果可以同妳一齊飲就好~」(14:39)

Winnie傳來一個信息
「我呢邊冇得賣呀………」(14:40)

「專心上堂啦，男班長~」(14:41)

「係呢，點解佢會主動要做女班長㗎@@？」(14:41)

唔知邊個通風報信呢，收風收得咁快嘅...

「我唔知，亦都唔想知~」(14:42)

「我淨係對妳嘅嘢有興趣㗎咋~」(14:43)



Winnie回覆
「哼，算你啦~」(14:43)

到放學後，阿Paul同晴晴叫咗我去canteen食tea。

「其實你知唔知點解佢會咁想做女班長？」晴晴拎住件三文治問我。

「唔知喎，可能佢想張cert多啲嘢寫？」我回應。

「少年，你太年輕了。」阿Paul咬住隻雞脾咁同我講。

「食雞煲戈晚我地見倒哂喇。你嚫我地走哂拖住人送人番屋企。」晴晴講。

「戈日解散之後我同晴晴去咗增值八達通，番轉頭就見倒哂。」阿Paul講。



「家怡叫我送佢番去咋嘛，加上佢飲醉咗。我同佢冇嘢㗎！」我激動地回應。

「呢啲自己同Winnie解釋啦。」晴晴講。

「聽家怡講，佢戈日之後就好似對你有啲嘢。你自己注意吓啦。」阿Paul講。

「總之我淨係中意Winnie㗎姐。」我回應。

「有你呢句就得喇。」晴晴回應。

之後我地就番屋企。番到去之後我即刻開Skype搵Winnie。

我即刻解釋哂雞煲戈晚嘅事，之後Winnie回應:「知唔知點解我一直唔問你吖？」



我都未諗到點答，佢就繼續講。

「因為我信你呀，男班長。」

聽完呢句我好感動。

「多謝妳肯信我呀~」我回應。

「總之你自己睇情況啦。有需要就同人講清楚。」

「係嘅，我知道喇。」

「咁後日再傾啦，我要同阿媽去買嘢。」Winnie講。

「好啦，拜拜。」



「拜拜。」






開學日，冇咗妳喺身邊，總係覺得差咁啲嘢。