《毒L和初戀相識的日子》: 第一百六十八章 週末前夕

第一百六十八章 週末前夕

「我想講呢，你塊面黐咗粒飯呀~ 其實我一早想提你㗎喇~」Winnie笑笑口咁同我講。

睇嚟，係啱啱食飯戈陣唔覺意黐上的。我隨即用一張紙巾抹走。

「唔該妳提我喎~」我有少少尷尬咁回應。

「唔洗客氣~ 咁我哋今日傾到呢度先啦，過幾日再傾過吖。」



「咁好啦，拜拜~」

「拜拜~」

間中同Winnie咁樣隔住個螢幕傾吓計，可以比我好大嘅動力。

到咗星期五，即係俗稱嘅happy friday，我準時番到公司。番埋今日就可以放兩日假了。

今朝主管要同我哋開一個briefing，叫我哋準時番到。



個Briefing歷時大約二十分鐘，每個人都係企定喺度嘅，大約兩、三個星期就會開一次。

至於Briefing嘅內容，主要都係講吓一啲無聊嘢，例如唔好遲咁多到、盡量做嘢戈陣少啲出錯同埋唔好成日「射波」之類。

「好，今日嘅briefing去到呢度，大家開工啦。」主管向我哋講。

我哋各自番去自己嘅工作崗位，我見倒阿倫再次非常唔情願咁教戈個新嚟嘅師奶做嘢。

捱過咗個上晝，到食lunch戈陣我再次見倒家怡同埋同佢同一部門嘅男同事一齊行。



仲記得上次佢點都唔肯講佢哋發展成點，佢話:「係… 秘密嚟㗎喎！ 」

其實諗番起佢戈次嘅表情，我大概都估倒件事係點了。

食完飯到下晝，我繼續做嘢。到咗大約兩、三點，公司嘅人事部打比我，叫我上去拎啲文件。

我暫時放低手頭上嘅工作，慢慢沿樓梯行上去人事部。

人事部隔離係公司管理層嘅office。我上人事部拎完文件之後，竟然比我撞倒一個諗都冇諗過會喺呢度撞倒嘅人。



見倒佢喺度，我覺得有啲驚訝。