《毒L和初戀相識的日子》: 第一百六十七章 再來一位「新同事」

第一百六十七章 再來一位「新同事」

等咗兩、三分鐘，我發現原來所謂嘅新同事係一位師奶。

我帶咗佢搭Lift落兩層，入到我部門主管嘅房。

「我接咗佢落嚟喇。」我對主管講。

「okay。咁Joseph呀，你幫我叫阿倫入嚟吖。」主管對我講。



睇嚟，佢想安排阿倫教佢做嘢。

大約十分鐘之後，果然同我所諗嘅一樣，阿倫死氣沉沉咁行去我身邊。

「你搞乜呀？」我問。

「我要教戈個師奶做文書嘢呀，唉。」阿倫回應。

「咁你加油喇。」



「唉，都唔知點解要咁對我......」

「你快啲教識佢咪唔洗再對住佢囉。」

到咗下晝，我收倒一個來自阿俊嘅Whatsapp。佢相約我今個禮拜六晚去Zoe屋企打牌，出席嘅將會有佢、David同埋Zoe。

今個禮拜六我day off，同埋冇嘢做，所以我將會出席。

到放工之後，我如常搭車番屋企，約咗Winnie今晚開Skype傾計。



食完晚飯之後，我準時坐喺電腦螢幕前，佢亦都準時online。

「我哋好耐冇傾計喇喎。」

「你玩嘢呀？明明琴晚先傾完~」

「今日又有個新同事去咗我做嘢個部門呀。」

「又有？」

「係呀，一個師奶嚟㗎。」

「吓？你哋公司竟然師奶都請？」

「我都唔知係咩玩法...」



「其實你唔洗咩都同我講㗎喎，我唔係一個咁專制嘅女朋友~」

「我知呀~」

之後我哋都係傾吓閒計，到最後佢話有樣嘢想同我講。

「男班長呀，我想同你講樣嘢呀~」

「好呀。」



唔知佢又想講咩呢~？