《毒L和初戀相識的日子》: 第一百七十章 一張合照

第一百七十章 一張合照

電腦枱角落嘅戈樣嘢係一個相架，入面放咗一張相，係年半多啲之前同Winnie去摩天輪我同佢一齊影嘅合照。

平時冇乜留意電腦枱放咗啲乜，多數用電腦都係同佢傾計，打機都比以前少咗。

呢張合照佢曾經用過嚟做Whatsapp嘅icon，不過佢icon依家轉咗做另一張合照，係年幾之前去長洲我同佢影嘅。

一張相片，可以紀錄低當時嘅畫面，日後都唔會忘記。



時間真係過得好快，不知不覺就已經過咗咁耐。仲記得戈陣幾乎日日都同佢見面，經歷咗好多開心嘢。

我坐喺電腦枱前，回想番同佢嘅開心嘢，之後就伏咗喺張枱度瞓着咗喇。

到我醒番之後已經係中午十二點幾喇，我行出房去廁所梳洗。

「陳旭祖，乜你咁晏先起身呀。」老母對我講。

「唔係好晏姐，同埋放假嘛。」我回應。



「我一陣去打牌，聽朝先番呀。」

「我都係呀，我上朋友度打牌。」我回應。

「係咪去上次戈個女仔度呀？」

「邊個女仔呀？」

「你之前咪叫我教你織條頸巾，話送比一個女仔嘅？」



「我唔知你講咩喎。」

如果佢冇離開香港，我只要行樓梯行落一層就可以見倒佢喇。

梳洗之後，我煮咗個麵食，仲有hea咗陣，就夠鐘出發去Zoe屋企打牌喇。

我早咗大約十分鐘到達Zoe屋企樓下，等咗一陣阿俊都嚟到喇。

「好耐冇見喇喎，Joseph。」阿俊向我講。

「都唔係好耐姐，一個幾月咋嘛。」我回應。

「你呢排都係番工？」

「係呀，番之前實習戈間公司。你呢，呢排有乜搞？」



「冇呀，都係做吓廢青咁啦，諗住過埋今個月就搵工。」

「咁都好吖。係呢，不如我哋上去先囉？」

「我哋等埋David先上去啦，佢話十分鐘之內到。」

「好呀。係喎，Jenny今日唔嚟嘅？」

當我講完呢句之後，阿俊面有難色。







我係咪講錯嘢呢......