第一百七十二章 流下眼淚的原因

原本我有拍門叫阿俊出嚟嘅諗法,不過比Zoe制止咗。我哋三個行番去客廳嘅麻雀枱坐低。

「阿俊做咩喊得咁犀利嘅?」Zoe問。

「我都唔知喎... 由中學識到佢依家,我都未見過佢喊到咁嘅。」David回應。

此時,我諗番起啱啱同阿俊喺樓下嘅對話,佢話佢同Jenny鬧咗交。



「啱啱我同佢喺樓下戈陣傾咗陣計,佢話同Jenny鬧咗交呀...」我對大家講。

「係咩?佢冇同我講過喎...」David回應。

「咁佢有冇話因咩事鬧交?」Zoe問。

「冇喎,佢話一陣打牌先詳細講。」我回應。

「咁依家點算好...?」Zoe問。



「等佢自己喊完就會出番嚟㗎喇。」David回應。

大約五分鐘之後,廁所嘅門終於打開了,阿俊從入面行出嚟。

佢雙眼通紅,勉強地笑住咁行過嚟坐低。

「唔好意思呀,我啱啱肚痛呀,所以去得耐咗啲。」阿俊對我哋講。

「你係咪有嘢想同我哋講呀?」David問。



「打一陣牌先啦。」阿俊回應。

我哋正式開始打牌。打咗兩圈多啲,阿俊終於主動向我哋講。

「其實我同Jenny上個星期鬧咗交。」阿俊冷靜地向我哋講。

「點解鬧交嘅?」David問。

「佢上個星期番part time,我去咗接佢收工,諗住比個驚喜佢,點知......」阿俊忍住眼淚咁講。

「點知佢嫌我太黐身...... 講吓講吓我哋就嘈起上嚟,最後佢話要冷靜吓... 之後我哋冇再搵過對方。」阿俊補充。

「你哋覺得我應該點做?」阿俊問。

「依家都已經七點幾,打電話去叫嘢食先,一陣再答你呢個問題。」David回應。



「咁我去打電話吖,你哋傾住先啦。」Zoe對我哋講。

有啲嘢真係好巧合。呢個時候阿俊部電話突然響起,佢望咗一望個螢幕之後,猶豫緊聽唔聽呢個電話好。

我同David出於好奇,同時望向阿俊部電話,睇吓係邊個打比佢。






究竟係邊個打比阿俊呢?
已有 0 人追稿