第一百七十七章 散水餅

喺我做緊嘢嘅期間,我同事阿倫行過嚟示意我跟佢行出去。

我立即放低手頭上嘅工作,跟佢行出去。

「叫我出嚟做咩呀?」我問。

「講樣嘢你知,今日係我last day,我之前已經遞咗信喇。」阿倫回應。



聽到呢個消息,我覺得好突然。不過,佢起碼冇好似阿婷咁粒聲唔出就走咗。

「吓,做咩突然唔撈嘅?」我問。

「我唔想再留喺度做喇,因為工作量大、人工又唔算高。你都要好好諗吓係咪繼續喺度做落去。」

「咁你之後打算點?」

「未知㗎,我再搵吓其他工。係喎,我依家去買散水餅呀。」



「好啦,一陣見。」

散水餅即係當一個人喺公司辭職,臨走之前請同事食嘅西餅,目的係多謝大家一直以來嘅關照。

今次係我出嚟工作之後第一次食嘅散水餅,唔知幾時會輪到我派呢?

大約半粒鐘之後,阿倫買咗一盒喺附近麵包店買嘅西餅番嚟請大家食。

「過嚟食嘢啦。」阿倫向大家講。



部門入面另外一個較相熟嘅同事叫阿輝,佢得知阿倫唔撈嘅消息都覺得有啲驚訝。

除咗主管之外,大家都有食阿倫買番嚟嘅散水餅,好快就得番個盒喇。

食完之後我哋繼續做嘢。到放工戈陣,阿倫向大家道別後便輕鬆咁離開喇。

我做嘢嘅部門又再少一個人,睇吓遲啲會唔會又安排新人入嚟啦。

放工之後,搭車番屋企嘅中途,我打開ig睇吓大家嘅近況。阿俊po咗一張相,係佢同Jenny去一間高級餐廳食飯,兩個人都笑得好開心,佢哋嘅關係經歷過鬧交之後變番好實在係好事。而其他人最近都冇更新。

正當我想熄mon小睡一陣,突然收倒阿Paul嘅信息。

電話顯示:「來自阿Paul的1個信息」







唔知佢搵我做咩呢?
已有 0 人追稿