《毒L和初戀相識的日子》: 第一百八十一章 職場上的戀愛

第一百八十一章 職場上的戀愛

同家怡傾咗幾句計之後，我番去繼續做嘢。工作嘅時間總係過得特別慢，好不容易終於捱到食lunch嘅時間喇。

我準時落到公司地下等家怡，佢都好快就出現喇，不過唔見佢身邊有人。

「得你一個嘅？」我問。

「Well，佢話做埋啲手尾先喎。我哋行去攞位先啦。」家怡回應。



睇嚟，我嘅直覺冇錯，佢肯定係介紹同佢瞹眛咗好耐嘅戈位男同事比我識。

行去食飯嘅路上，家怡嘅視線都冇離開過部電話，而我都冇講嘢。喺差唔多到達戈間茶記之前，佢問咗我一個問題。

「Hey，你知唔知Christy最近點？」家怡問。

自從I大last day之後，都好少聽倒有關佢嘅消息。

「唔知呀，last day之後都冇聯絡啦。」我回應。



「你唔知咁我話比你知啦，佢下個月要去New Zealand讀書喇。」

「吓，佢要去紐西蘭讀書？」

「係呀，佢下個月頭飛喇，到時我同晴晴都會去送機。你去唔去吖？」

「冇所謂呀，知道邊日未？」

「好似係下個月三號。我再問清楚佢之後答你吖。」



呢個消息對我嚟講都唔意外，佢屋企咁有錢，送佢去外國讀書都唔出奇。

我哋到達茶記，入去坐咗喺一張四人卡位。我望住餐牌，又係A、B、C、D等每日都差唔多嘅快餐。

我哋各自點餐，而家怡幫埋戈位即將要介紹比我嘅人點餐。幾分鐘之後，佢終於出現喇。

我之前已經見過佢幾次，所以我認得佢。佢向我點頭打招呼，而我都同樣向佢點頭示好。

「佢係Joseph，我喺I大識到依家嘅朋友。」家怡指向我講。

「佢係Kenneth，我哋喺同一個部門做嘢，同埋... 係我男朋友~」家怡指向佢講。

經過家怡嘅介紹之後，我哋就認識咗喇。喺食飯戈陣，我哋都有傾吓閒計。

家怡都有同我講佢哋點樣喺埋一齊。原來家怡喺實習戈陣已經認識Kenneth，主要都係佢教家怡做嘢。



家怡實習完咗之後繼續留喺度做嘢，佢哋從而慢慢培養出感情，大家都互相有好感，後來Kenneth表白之後佢哋就正式喺埋一齊。

另外，我亦得知原來Kenneth有個阿哥喺呢間公司度做嘢。

食完飯之後我哋番到公司，又再繼續做嘢喇。做嘢途中，我部電話突然發出鈴聲，代表有人send信息比我。唔知係邊個呢？





得知家怡又再有拖拍，我都替佢開心。