《毒L和初戀相識的日子》: 第一百八十二章 暑假

第一百八十二章 暑假

我拎起電話睇，原來係家怡嘅信息。佢話已經問清楚，Christy離開香港去紐西蘭嘅日期係下個月三號，即係仲有一個星期多啲。

佢再問多我一次戈日去唔去送機，我爽快地向佢講去。畢竟大家都識咗接近兩年，雖然之前同佢發生咗啲事，不過我一早已經冇放喺心入面喇。

覆完機之後我繼續做嘢，幾經辛苦終於都捱到放工喇。

每日重覆咁番工放工嘅日子雖然一啲都唔好受，不過我漸漸地開始習慣喇。



七、八月呢啲日子，對仲讀緊書嘅人嚟講，係放暑假嘅日子。但係，對在職人士嚟講，就係幾乎一日紅假都冇嘅兩個月。

幾日之後，到咗暑假嘅最後一個星期六，阿Paul同晴晴約咗我去食飯，我同佢哋再次見面喇，上個星期先出咗嚟睇戲。

佢哋九月之後會好忙，今餐當係同佢哋食開sem飯啦。我哋約咗去大埔食晚飯。

由於今日係星期六，加上我唔洗番公司OT，所以我瞓到中午十二點先醒。起身之後，我老母突然問我呢啲嘢。

「陳旭祖，你同人地點姐？」



「人咩地，我唔明喎....」我回應。

「王小姐呀，扮嘢呀你？我同佢阿媽好熟㗎。」

我聽倒「王小姐」三個字就知道已經穿咗煲喇。

聽老母講，原來自從小學戈次困Lift之後，佢同伯母就friend咗，仲成日一齊飲茶、打牌... 呢件事我依家先知。

「咁妳應該知佢地去咗英國啦...」



「係呀，去咗年幾啦。我好耐都冇同王太打牌喇。咁你地兩個點姐？」

「唔知喎，學妳話齋，命運自有安排。」

「咁加油啦你地。」

到四點幾，我出門喇。點知，部Lift維修緊。咁我唯有行落一層搭。我落到去九樓之後，竟然比我見倒Winnie間屋有人搬傢俬走。乜佢唔係租咗比人住咩...

我出於好奇，落到樓下之後問吓保安姐姐:「乜九樓王太佢唔租比人喇咩？」

「係呀，上個星期有個地產過咗嚟。聽講係租約完咗，新約要加租，所以佢先唔租。」

原來係咁，等我仲有一絲希望係Winnie佢地番嚟香港，搬番嚟住。

呢件事我都有用Whatsapp問Winnie，佢錄音比我話:「係呀，我阿媽要加租，個租客覺得貴所以咪唔租囉。依家仲搵緊租客呀。做咩喎，你咁想我番嚟咩~？」



想㗎，我超想。不過又有乜可能吖...

我回覆:「我緊係好想妳番嚟啦。無論點，我都會繼續等落去嘅。」

我約咗阿Paul、晴晴喺太和火車站等，之後去咗一間韓式餐廳食嘢。

點餐之後，我哋傾咗陣計。

「Joseph哥，你仲做緊戈間公司呀？」阿Paul問。

「係呀，都做慣咗喇。」我回應。

「咁咪可以養Winnie囉~」晴晴回應。



「妳... 講咩呀… 」我口窒窒咁回應。

「唉，就嚟放完暑假喇。之後有排忙。」阿Paul無奈地講。

「加油啦你地兩個~」我回應。

我哋食完之後，大家都覺得唔太飽，於是佢哋兩個帶咗我去附近嘅一間糖水舖食糖水。

我哋入到去坐低，阿Paul發現對面枱有一個好熟悉嘅人，不過一時之間諗唔起佢係邊個。





我應該有排都唔會再有暑假了。