《毒L和初戀相識的日子》: 第一百八十三章 似曾相識

第一百八十三章 似曾相識

「你哋覺唔覺得戈個男人好熟口面呀？」阿Paul望向對面枱。

我隨即望向對面枱，張枱有一男一女，佢哋喺度食緊糖水，就咁睇年紀大過我哋幾年。戈個男人睇落又真係好熟口面。

「係囉，好似之前喺邊度見過咁，仲要唔只一次添...」我猶豫地回應。

「你哋有冇搞錯呀？咁快就已經唔記得？」晴晴無奈地向我哋講。



「我一時之間真係醒唔起佢係邊個...」阿Paul回應。

「係囉，妳不如開估啦。」我回應。

「佢咪係Billy sir囉，之前I大全人發展戈個阿sir呀！你哋咁都唔記得？」晴晴有點不耐煩地回應。

「咦，係喎！」我同阿Paul異口同聲地回應。

原來佢係Billy sir，隔離戈個應該係佢女朋友喇。



「不如去打聲招呼囉？」阿Paul提議。

「唔好阻住人哋啦，快啲叫嘢食好過啦！」晴晴回應。

我叫咗一個椰汁紫米露，而佢哋兩個就叫咗一碗楊枝甘露share食。

等待期間，Billy sir都見倒我哋三個，並向我哋揮手打招呼。而我哋三個亦都向番佢揮手打招呼。

打完招呼冇幾耐佢就走喇。



「咁都喺度撞倒佢嘅。」阿Paul向我哋講。

「係囉，幾巧合吓喎。」晴晴回應。

「我早排喺公司撞倒梁sir添。」我回應。

「係咩，佢去搞乜？」阿Paul問。

「好似話搞啲我哋去實習嘅文件喎。」我回應。

食完糖水之後時間都唔早喇，阿Paul同晴晴送我去太和火車站搭車。

今日見面之後，可能有一段時間都見唔倒佢哋喇。佢哋喺City U應該會好忙。

話咁快就已經行到去火車站喇。



「咁你哋喺City讀書加油喇喎！」我向佢哋講。

「你做嘢都要俾心機呀！」晴晴回應。

「得閒再約過出嚟食飯啦，Joseph哥！」阿Paul回應。

我入閘後望向後面，並向佢哋揮手道別。我相信好快又會再見倒佢哋㗎喇。

搭車番屋企途中，我見倒Winnie send咗幾張相比我，不過個網速比較慢，暫時仲未load倒。







希望佢哋讀書順順利利啦！