《毒L和初戀相識的日子》: 第一百八十六章 巧合

第一百八十六章 巧合

佢係Kenneth，即係家怡個男朋友。我哋互相見倒大家之後都有打招呼。

「原來你喺呢個部門做嘢㗎，Joseph。」Kenneth向我講。

「係呀。你係咪拎個插頭比阿輝？」我問。

「係呀，佢係我呀哥。不過唔見佢嘅？」



「佢比人捉咗入房呀。你放低吖，我一陣會幫你比佢㗎喇。」

「好吖，唔該哂你呀Joseph。咁我番去做嘢先喇，拜拜。」

「拜拜。」

原來阿輝口中比佢細三年、都喺呢間公司做嘢嘅細佬就係Kenneth，我覺得成件事好巧合。

隔咗一陣，阿輝終於從主管房出嚟喇。



「幫你拎咗喇。」我將個插頭比佢。

「唔該哂。」

「原來我識得你細佬喎。」

之後我話佢細佬係我同學個男朋友，佢聽倒之後都覺得好巧合。不過，原來佢一早知佢細佬拍緊拖。

到差唔多放工戈陣，家怡send咗個信息比我，佢同我講晴晴已經去買咗個耳機，準備星期日送比Christy，仲叫我保守秘密。



放工之後，我同阿輝一齊行，落到公司樓下見倒家怡同埋Kenneth喺我哋前面。

「咦，你細佬喎。」我向阿輝講，並指向前方。

「係喎。佢細我三年都有得拍拖喇，點解我仲未有呢...」阿輝回應。

「再等吓啦，總會有機會嘅。」

「希望啦。」

「其實我哋部門戈個，你可以考慮吓喎。」

「你話阿婷？佢都冇做咗好耐啦。」

「唔係佢，我係話戈個師奶呀。」



「頂你，我先冇咁重口味。」

我哋行到巴士站之後分開。

搭車番到屋企之後，晴晴用信息同我討論星期日喺邊度集合好。去送機嘅人有阿Paul、晴晴、家怡、阿俊同埋我，而Jenny就唔得閒去。

最後我哋決定直接去機場等，因為Christy屋企人會車埋佢去機場。

我哋約咗星期日下晝四點喺機場等，而Christy班機係下晝六點二十五分。

之後我向Winnie講呢件事，話比佢聽我星期日去送機。佢話得悉Christy會去紐西蘭讀書之後都唔覺得意外。另外佢仲話我唔洗咩都同佢講，佢唔係戈啲好專制嘅女朋友。

過咗幾日就到咗星期日喇，我準備出門口之前，收倒一個信息，係Christy send比我嘅。






佢搵我講咩呢？