第一百八十九章 充滿回憶的地方(下)

我哋兩個上到去間cafe,喺門口行入去已經聽倒間舖播緊歌。我哋入去之後坐咗一張四人枱。

我望吓間舖入面嘅環境,發覺都冇乜好大嘅轉變,燈光依然都係咁昏暗,而且都係冇乜客人。

「Hello呀Zoe,好耐冇見喇。我拎menu比你哋吖。」Winnie朋友的家姐向我哋講。

佢隨即行去拎menu比我哋睇。



「其實佢係Winnie邊個朋友個家姐?」我問Zoe。

「吓,你唔知咩?聽講你哋都嚟過幾次㗎喇喎。」Zoe回應。

「係呀,我都冇問過佢。」

「係我同Winnie個中學同學,叫做Jessica。佢去咗台灣讀書,我哋三個中學戈陣好friend㗎,直到依家都係。」

「原來係咁~」



之後我哋叫嘢食,同樣叫咗煙三文魚意粉同埋芝士煙肉pizza。

雖然我已經有一段時間冇嚟,不過食物嘅水準同之前一樣非常好。

我哋食完嘢之後,Zoe拎咗部notebook出嚟。由於我哋係對住坐,所以我唔知佢搞緊乜。

「係喎,你又話有神秘活動嘅?」我問。

「係呀,你等我一陣啦。」Zoe回應。



之後我㩒吓電話等佢,等咗都有大約十分鐘。

「你坐埋過嚟呢邊吖。」Zoe向我講。

我隨即坐去佢隔離,發現原來佢開咗Skype,而Winnie已經出現喺螢幕中。

Zoe借咗部notebook比我同Winnie傾計,我哋傾咗大約十五分鐘,主要都係傾吓大家嘅近況。之後佢話要出街,所以就傾完喇。

呢排每星期都有一兩次同佢開Skype傾計,而我哋每日都會用Whatsapp搵吓對方嘅。

「原來妳約我出嚟係因為咁,多謝妳喎。」我向Zoe講。

「唔洗客氣。不過我仲有件事想同你講~」Zoe回應。

「咩事呢?」



「你要應承我唔好同其他人講㗎喎。」

「得啦,妳講啦。」



唔知佢想講啲咩呢?
已有 0 人追稿