《毒L和初戀相識的日子》: 第二百章(最終章) 命中注定
第二百章(最終章) 命中注定
九月之後，間唔中都有約I大嘅朋友出嚟食飯。阿Paul同埋晴晴去咗City U讀Chem，阿俊同Jenny就做吓part time。Christy去咗紐西蘭升學。至於家怡，佢喺我哋實習間公司識咗個新男朋友Kenneth，依家仲喺戈度做，所以我間唔中都會喺公司見倒佢。
話咁快我已經喺I大畢業咗幾個月喇，今日到咗晴晴約我哋出去食晚飯嘅日子，總共有八個人會去。除咗我仲包括阿Paul、晴晴、阿俊、Jenny、家怡、Zoe同埋David。
出門口之前，我依舊會執吓個儀容。呢個習慣係識咗Winnie之後先有。加上依家有一班朋友，又有固定工作，唔會成日宅喺屋企，睇嚟我已經正式脫離咗「毒L」呢個形容喇。
我哋會去尖沙咀一間火鍋店食嘢，約咗喺尖沙咀地鐵站集合。我去到見倒阿Paul同埋晴晴已經到咗。
「Joseph哥，好耐冇見~」阿Paul講。
「好耐冇見喇~ 你哋最近點？」我回應。
「喺City U，比起I大多好多嘢做，不過我地都應付倒。咁你呢？」阿Paul回應。
「仲番緊戈間公司，都ok呀。」我回應。
「Joseph，你廿五號星期六夜晚得唔得閒呀？」晴晴問我。
「我得閒呀。點解咁問嘅？」我回應。
「之前聽你講過話你中意睇IU，佢廿五號嚟香港開concert。咁啱我個friend個同事有飛多，我諗住益你，請你去睇。」晴晴向我講。
「多謝妳呀~」
「唔洗客氣啦。咁我send個電話比你啦，佢星期六開場之前會喺博覽館比飛你，你到時打比佢就得。」
「好呀。」
「你千奇唔好甩底呀，啲飛好貴㗎。」
「我緊係唔會甩底啦~」
我當然唔會甩底，始終自己係IU嘅fans.
晴晴即刻send咗佢個friend嘅同事個電話比我，佢叫做「陳小姐」。
到齊人之後，我哋一齊行去火鍋店。
「你同Winnie最近點呀？」Zoe問。
「咪又係咁，keep住有聯絡囉。」我回應。
「你唔掛住人咩？」
「掛㗎，不過佢唔比我飛去搵佢，要我慳番啲錢。」
「真係頂你哋唔順~ 佢遲啲放假應該會番嚟嘅，你再等吓啦。」
「嗯。」
數吓手指，我已經接近一年七個月冇見過Winnie真人。
到咗火鍋店，我哋坐咗喺一張大枱。呢間火鍋店嘅食物種類十分多，而且質素都幾好。
食完嘢之後，我哋一齊行番去地鐵站。
「Hey guys，有冇興趣去我做緊戈間公司做呀，請緊人喎。」家怡問阿俊同Jenny。
「好唔好做先？」阿俊問。
「係囉，間公司點㗎？」Jenny問。
「咁就要睇吓去咩部門喇。」家怡回應。
「我覺得都可以，不過有時要OT囉。」我回應。
「咁我再諗諗先。」Jenny回應。
「okay，有興趣再搵我啦。」家怡回應。
之後我哋八個人就喺地鐵站分開，唔知下次見面係幾時呢。
到咗11月25號星期六，戈日我要番工加班。到五點收工之後，我搭巴士去機場博覽館。
喺車程中，我諗番起兩年前同Winnie一齊去睇IU嘅畫面，戈時我同佢仲未一齊。
兩年前個show係喺九展舉辦，今年就喺博覽館。兩年前係我哋兩個去睇，今年就得番我一個......
我到咗博覽館之後，就打比戈個陳小姐。
「喂，陳小姐？」
「我係，你係晴晴個朋友？」
聽完佢把聲之後我心諗: 咦，點解把聲咁似Winnie嘅。唉，一定係我太掛住佢，依家連幻聽都有埋。
「係呀，你喺邊呀，我已經到咗博覽館。佢叫我去搵你拎飛。」
「咁去7-11出面等啦。」
把聲真係好似…
「好啦，拜拜。」
我入到博覽館，周圍都有「2017 IU Tour Concert "Palette" in Hong Kong」嘅poster。
搭電梯上咗一層，再行到尾就到7-11。不過，到咗之後我唔見戈位陳小姐。
等咗五分鐘，有個人喺我背後拍咗我幾吓。當我轉身戈時，我見倒一個熟悉嘅臉孔。一時之間，我講唔倒嘢，係唔知講咩好。
「做咩唔出聲喎？開場喇，行囉。」佢向我講。
之後佢捉住我隻手，我哋兩個慢慢行番落一層去入場。我哋坐咗Zone A中排嘅位。場show一如以往冇冷場，好好睇。
除咗好多美好嘅韓文歌，今年亦都有廣東歌。IU除咗《囍帖街》之外，仲唱咗一首改編至佢首《夜信》嘅中文歌: 《長夜》。呢首歌係佢送比我地香港fans嘅禮物。
「長夜 一扇窗
帶愛的信 藏心裏
像 歡笑聲 仍然清脆 hmm...
螢火的光芒飛 遠去
默 不作聲
再吻妳千遍 遐想裏
乘著 這晚風 魂遊太虛 hmm...
尋找多溫柔的 愛侶
海 翻了浪淹沒誰
像那寫於沙灘所有默許
仍然很想妳 徘徊夜空穿過雨水
我 為妳寫 為妳追
情人為何像流水 搜索幸福
可不可以躺下來寄居
螢火飛不回的 過去」
曾經無數次想像過同佢見面嘅畫面，究竟應該同佢講啲咩、應該去做啲咩。甚至連對白我都有構思埋，不過當戈一刻真係來臨嘅時候，我係完全講唔倒嘢嘅，個腦一片空白。
完show之後，我同佢等啲人走得七七八八先再行。
「男班長呀，我唔番英國喇，會留番喺香港。我哋唔洗再分開喇。」佢向我講。
我相信命運嘅嘢，係注定嘅。