《毒L和初戀相識的日子》: 特別篇(下)

特別篇(下)

第一日去到落機已經係下午。我地喺桃園機場搭捷運番旅館先。旅館位於台北車站附近大約二十分鐘嘅步程。分房方面，book咗五間雙人房，分配如下: 我+阿Paul、Winnie+晴晴、Zoe+Jenny、阿俊+David、家怡+Nicole

夜晚我哋上咗台北101睇夜景，影咗唔少相。呢度可以遠眺台北嘅繁華景色。

去完101，我哋去咗附近嘅一個夜市掃街，食咗好多台灣嘅地道美食。

第二日嘅行程係朝早喺旅館食早餐，之後再番房hea一陣。到咗大約十一點，我哋出發去十分。



喺十分車站放天燈，我中五戈年同屋企人已經去過一次。戈次Winnie上嚟同我惡補英文speaking，佢睇倒我放喺電腦枱嘅相，之後話好想放一次天燈。今日，終於可以實現佢嘅願望了。

到咗十分，車站路軌嘅兩旁係一間間嘅店舖，絕大部份都係賣天燈嘅。我哋決定兩個人放一個。

行入其中一間舖頭，店員比咗一個天燈同埋兩枝水筆我哋。

「不如你寫先~？」Winnie向我講。

「好呀~」我回應。



我同Winnie都各自寫咗啲願望落去，例如永遠喺埋一齊之類啦。

寫完願望之後，一個店員跟埋我哋出去幫我哋影相，同埋點火放天燈。

成件事好快就完，我見倒Winnie個表情好滿足。

第三日嘅朝早，我哋去咗總統府參觀。到下晝，我哋去咗西門町行街，同埋去咗一間超市掃貨，買手信番去。

到夜晚，我喺房執完行李之際，Winnie send咗段Whatsapp話想去食宵夜，我見倒之後當然即刻應承。



「Joseph哥，你去邊呀？」同房嘅阿Paul見我準備落街問我。

「要同人哋去食宵夜呀~」

「哦，唔阻你哋喇~」

我哋兩個喺旅館房外等，之後出發。

「妳想食咩宵夜呀~？」我問。

「周圍行吓先啦~」Winnie回應。

我哋手拖手喺條街行，離遠見倒一間非常熟悉嘅「餐廳」，老麥。

「食老麥好唔好~？」我問。



「頂你啦，喺香港仲食唔夠？」Winnie打咗我一吓膊頭。

我哋再一路行，去到市民大道。我哋見倒有一間食牛肉麵嘅餐廳。

「呢間好唔好~？」Winnie問。

「好呀~」我回應。

我哋叫咗一碗招牌牛肉麵再加兩個小食share，味道唔錯。

食完之後喺行番旅館嘅路程上，Winnie問咗我一個問題。

「其實我戈陣就咁走咗去，你有冇怪過我㗎？」佢問。



「做咩咁問... 怪就冇怪妳，不過唔開心咗好耐囉...」我故意扁起嘴地回應。

「你唔好咁啦，我哋唔會再分開㗎喇~」佢捉實我隻手回應。

番到旅館樓下，阿Paul突然打比我。

(妳要離開 我知道很簡單 妳說依賴...) 我部電話響起。

「喂？」

「喂，Joseph哥呀，你今晚去Winnie間房瞓有冇問題？」阿Paul向我講。

「吓，玩咁大？」

「晴晴過咗嚟我哋間房呀。你識做啦。」



「唔係掛...」

「就咁啦，你啲行李我放去Winnie間房喇。拜拜。」

我未出得切聲，阿Paul已經收咗線。同時，Winnie都收倒晴晴嘅信息。

「今晚我哋……」我吞吞吐吐地對佢講。

「你唔想咩？」佢問。

「唔係，不過...」

「唔係就上去啦。」



「嗯。」

我哋入到房，阿Paul一早將我個行李喼搬咗過嚟。我企咗喺度唔知比咩反應。

房內共有兩張單人床，中間隔咗個櫃仔。

「做咩企喺度喎，過嚟啦。」Winnie向我講。

「吓？」

「我係話過嚟坐低呀。」佢指向另一張床。

「好。」

「我要執行李呀，你可以沖涼先。」

「好呀。」

到凌晨兩點幾，我哋熄燈瞓。

「男班長呀，你記唔記得我哋係點識~？」Winnie喺漆黑嘅房間問。

「小學困Lift嘛。」我回應。

「嗯，之後第一日番I大就見番你~」

之後我哋傾咗好耐，回憶番呢段時間所發生嘅事，經歷咗漫長嘅一晚。

第四日冇乜行程。我哋十個人一早去咗台北車站提早check-in，之後去附近食埋個lunch，再行咗一陣就搭番捷運去機場。

去完旅行番香港之後，大家又繼續番去自己嘅崗位，各有各忙。

我深信我哋呢班人嘅友誼可以一直持續，更相信我同我嘅初戀可以一齊幸福咁生活落去。

《毒L和初戀相識的日子》全文完