黑貓...呢個係籃球場上人哋對我嘅稱呼。

因為長期係猛烈嘅陽光下訓練而曬黑嘅皮膚,靈活嘅身手,比人嘅感覺好投入但同時又好冷靜同沉默。

每次企係籃球場上面果陣我都會完完全全咁投入落比賽到,因為...我鐘意籃球,至少係一年前都仲係...雖然係中一嗰陣我已經越級打緊大grade,但係果陣淨係打波打咗一年都無嘅我竟然會覺得無乜挑戰性。

而且仲記得一開始打波果陣我好廢,用咗半年先學識射波,但係我鐘意呢樣運動嘅原因就係因為我廢,我享受進步,享受挑戰嘅感覺。

所以我暑假果陣,每日至少有十個鐘都係籃球場到,就係因為咁,我將所有我學過嘅嘢都練到爐火純青,結果反而令到我失去咗原本嘅感覺,無咗挑戰性。





所以我果陣嘅目標其實係幫學校拎咗冠軍就去美國發展,但係呢個時候就出現咗我最大嘅敵人...傷患...傷患令我所有計劃都打亂晒,所以最後我放棄咗呢個目標,轉為集中係寫作上面,至於點解係寫作...就係因為我想實現初心,享受挑戰同突破,同埋...打破常人嘅故有印象,對於事物嘅印象...所以放棄咗籃球夢之後我就留咗係香港,之後就變到而家咁。

阿峰佢竟然練咗咁穩定嘅三分,加埋佢嘅籃底技巧...睇嚟今場有啲難搞...阿龍拍緊波過半場果陣我同我哋嘅中鋒講咗下一球開始由我守阿峰,之後我幫阿龍做咗個單擋,然後出返去三分線接波起手,雖然對面換防換得都幾快,但係係我面前,都係慢得濟,我起手之後直接轉身,然後身後傳嚟穿針仲有歡呼聲,Answer Three...

時間直接嚟到第四節嘅最後三分鐘,比分係52-52,而雙方嘅體力都差唔多用盡。

但係我嘅體力竟然比我想像中好咗好多...我嘅活力好似源源不絕...順帶一提我哋果邊數據最好嘅係我嘅40分同12籃板而對面嘅就係阿峰嘅28分11籃板5助攻。

係對面控衛嘅一個失誤下,球權落到我哋到,阿龍直接將粒波傳落我度,我帶過半場之後選擇放慢節奏,係進攻時間淨返五秒嘅時候,我運用咗中鋒嘅pick,直接係三分線後三步出手,不過直覺話俾我聽呢球唔會入,所以我起手之後跑向籃底,粒波果然冇入,我避過米九嘅阿峰,將粒波大大力咁送返入網,現場起氛再次沸騰。





但係阿峰保持冷靜,靠住隊友嘅一個長傳直接入咗球三分,時間淨返分半鐘,我傳波比阿龍果陣,阿峰突然拍走咗粒波,向籃筐跑去,不過佢竟然係快攻射三分,三分入咗之後對手用全場緊逼嚟壓制我哋,但係比阿龍搵到破綻之後長傳俾我射三分,三分輕鬆取得,比分嚟到57-58。

我哋落後一分,而時間淨返30秒,對面拖延時間淨返6秒果陣射失咗兩分,我拎到籃板之後即刻嗌咗個暫停。

時間淨返4秒暫停結束咗之後,阿龍直接傳咗粒波比我,我帶波剷向籃底,但係係罰球線急停,令到防守球員跌到嘅同時阻礙咗阿峰補防,我隨即出手...響哨聲響起...裁判宣佈最後嘅比分係59-58,黃社三連霸,觀眾同隊友嘅歡呼聲不斷,但係我無太激動,因為所有嘢都係我預料之中,包括果球失誤...其實係為咗消耗對手嘅體力,同埋營造呢一球絕殺。

比賽完咗之後,阿峰行埋嚟,我本來以為佢會因為我嘅退隊而討厭我,但係佢竟然咁樣講:

「希哥,我哋今晚有個籃球隊嘅聚餐呀,教練都會嚟,你一定要到呀!」





「你唔嬲我?」,我望向佢雙眼

「無人會嬲你架,我哋嘅英雄」,佢微笑道。

講完之後佢就去咗換衫,之後愛盈就跑過嚟攬住我,

「嚇死我喇...我仲以為我哋會輸呀...」

俾佢攬住...雖然心跳加速咗,但亦有種平靜嘅感覺,令我忍唔住摸佢個頭,

「傻妹...我而家成身汗呀...」

佢聽到之後就彈開咗...換完衫之後阿峰就send咗個訊息嚟。

-一陣八點半老地方!記住嚟呀!





-ok

八點半...而家先七點...仲可以返去換件衫先後再出嚟,係搭緊車返去嘅途中,我問黃愛盈,

「黃愛盈,你一陣得唔得閒同我去一個地方?」

「好呀~」