當我再次睜開雙眼嘅時候,我已經脫離咗夢境。

我望向窗外,太陽都未出嚟,愛盈當然都未訓醒,我望住愛盈,心中暗暗發誓一定要好好咁樣保護好呢個人,唔會再俾佢受傷,憶奇都係,睇嚟我以後全日廿四小時都要保持警戒喇....

之後我望一望電話,而家先至五點半....趁有時間,都係打下文算,還掂又冇嘢好做,結果不知不過就打到七點幾,都打得差唔多喇....正當我諗住起身去厠所嘅時候,我部電話突然震咗一下,有一條新嘅訊息,係出版社嘅編輯send過嚟嘅,

言姐-希希!!你第一本實體書已經係書局上咗架喇!!另外你第二本嘅書已經印好曬喇!差未整好封面咋!同埋呢~係你本書上架嘅同時我哋都順便送咗兩本去你屋企喇!你同女朋友睇得開心啲啦!

我-言姐你點知我有女朋友架....同埋唔好叫我希希...(得愛盈先叫得)





言姐-因為我哋嘅黑貓先生最近寫文好似寫得越嚟越有戀愛嘅感覺呀嘛~下次上嚟公司記住帶埋你女朋友仔呀!我要睇下佢可唔可愛!仲有仲有!簽書會嘅時間已經確定咗喇!就係2020年1月1日!地點就係公司附近嘅書店!朝早十點開始!記得早啲到呀!

我-好,無問題

之後我就放低咗部電話,去咗廁所,實體書上架仲有簽書會,真係一個驚喜嘅聖誕禮物,睇嚟最近運氣都算唔錯,啲嘢發展得越嚟越成功,而且而家嘅收入睇嚟已經可以維持到唔錯嘅生活

不過無論如何,都唔可以放鬆警戒,去完廁所之後,我就去叫醒咗愛盈然後煮早餐,今日我決定煮個美式小小嘅早餐,炒兩隻蛋,煎少少腸仔,加幾塊多士,大功告成,憶奇聞到香味之後即係跳咗上嚟咬走舊腸仔,佢究竟係貓定狗嚟架....不過見到佢回復咗精神都唔錯嘅。

食完早餐之後我哋就去咗行街,畢竟今日係聖誕節,淨係留係屋企都唔係幾好,所以我哋就出咗嚟附近嘅商場行下,當感受氣氛,順帶一提憶奇經歷完尋日嘅事之後話佢要匿喺屋企成個月...





真係可憐,行咗三四個鐘我哋就番去,因為其實 除咗食嘢之外呢度都無乜嘢好行,最多嘢睇嘅就係個間九成嘅嘢都係假貨嘅玩具鋪....係番去嘅途中,愛盈入咗間士多買咗一袋嘢就出番嚟,當我想行過去幫佢拎果陣佢竟然堅持要自己拎住,咁唯有俾佢拎啦....

番到去之後我哋好快就食完飯,當我諗住同愛盈繼續睇埋琴晚果套嘢果陣,門鐘聲突然響起,我打開咗門之後係我眼前嘅係一個快遞員,叫我簽收包裹,睇嚟係啲書送到喇,之後我就拎住個紙箱坐係梳化上面,

「咩黎架~」,愛盈痴埋嚟。

「呢個係...聖誕禮物,屬於我哋兩個嘅聖誕禮物。」

就用鎅刀打開咗個紙箱,係入面拎咗兩本書出嚟,上面寫住 「《同居》第一季(上)  作者:黑貓 」,而封面係擬人化嘅貓男攬住一個犬女,我望向愛盈,想睇下佢會露出咩表情嘅時候,佢同時都撲向我,然後...扯高我件衫...





「愛...愛盈?」