同一時間,廢校內,阿龍同阿峰兩個人喺到進行討論,

「不如都係唔好同佢講啦,我驚...」,阿峰皺眉講。

「驚咩啫,以佢嘅性格一定接受到嘅,你唔好諗得咁多啦,牛高馬大咁鬼細膽,唔怪得知你溝唔到女啦,同埋我都約好咗佢啦,唔通約佢嚟呢度齋坐咩」,阿龍一輪嘴講。

「咩啫,我想嘅咩~我呢啲叫謹慎,優點嚟架。」,阿峰反駁道。

「得喇得喇,廢事同你嘈,話說而家都過晒約定時間喇喎,以佢嘅性格冇可能會早到架喎,你打個電話俾佢睇下咩事啦。」





跟住阿峰就連續打出咗三次電話,然而冇一次有人聽,

「佢會唔會係有咩事...不如上佢屋企睇下....」

「好...」

跟住佢哋就係捷徑跑過去...

...





「希!希!你無事吖嘛!發生咩事呀!」

呢把聲...係阿龍...我慢慢咁擘大眼,佢哋兩個亦都扶住我坐番起身,

「究竟發生咗咩事...點解果幾條友...」,阿龍語氣驚訝咁望住前方。

「我都無乜印象...我淨係記得佢哋幾個想襲擊我,之後就....」

只見眼前滿地鮮血。





當我想諗翻起成件事完整嘅經過果陣,我果頭就開始痛,到底發生咗啲咩事...

正當我哋仲係度思考緊嘅同時,眼前三人嘅屍體突然變得越嚟越紅...

「咩...咩事...佢哋唔通唔係人類嚟嘅...」,我哋同時退後一步。

「唔係...你睇清楚啲,佢哋三個嘅膊頭都有同一個圖案嘅紋身,而且紋身嘅中心...發緊光...」

果個紋身嘅圖案係一個骷顱骨頭,而且咬住一把刀,呢個圖案佢哋三個都完全一樣,包括大小同方向,只係紋咗係唔同嘅位置,當我哋聚精匯神咁望緊佢哋嘅屍體嘅時候,三兄弟嘅屍體同時發生咗小型爆炸,然後灰飛煙滅,就連骨灰都無一粒,而且爆炸規模極細,只有三架單車嘅體積...

我哋三個都俾眼前嘅境象嚇到不知所措...

「究竟...發生咗咩事...」
...





同一時間。

一個深山別墅嘅某間房入面,一個面目憔倅嘅中年男人激動咁拍咗一下佢眼前嘅電腦枱,

「咩話!竟然失敗咗!!呢個已經係目前能力最強嘅試驗品嚟架喇喎...究竟對手要強得幾變態先可以打得贏...唔得,快啲匯報俾老大!」