「咁但係我哋要點樣過去呀?」

愛盈好奇咁問我。

「你好快就知。」

我微笑咗一下然後就緊緊咁樣拖實佢白滑嘅左手,成個動作非常自然,就好似一般情侶會做嘅動作咁,但係愛盈塊臉唔知點解好似有啲紅,而且佢突然停低咗腳步,企咗係原地。

我將塊臉湊到佢臉前,令到我哋兩個塊臉嘅距離淨返不足十厘米,然後我用手指篤一篤佢塊面珠登,佢好似好怕醜咁轉移咗視線,





「你臉好紅。」,我笑住講。

「因...因為,你平時都唔會咁做,呢次仲要係你第一次拖實我隻手,同埋你之前明明無咁主動...」

佢講完之後抿一抿嘴,本身佢個樣已經夠曬可愛,點知係咁近嘅距離望埋去,竟然會更加可愛,直頭融咗我。

「咁我以後...多啲主動,同埋多啲襲擊你啦。」,我奸笑一聲。

「襲...襲擊我?你想....」





我無比佢講埋落去,因為係呢個時候,我已經封住咗佢把口,用我個嘴。

三十秒之後,我哋兩個嘅嘴唇終於分開咗,

「喂吖~做乜係街咁樣呀。」

佢塊臉依然紅曬咁講,

「偷襲成功。」





我忍唔住笑住咁講,

「你小心我報仇呀!」

「求之不得。」

跟住我就繼續拖住佢隻手咁行去巴士站度,等咗一陣間架巴士就嚟到,

上咗車之後佢又開始好奇,

「呢架巴士我無搭過喎,去邊架?」

「去一個...好適合我嘅地方。」

「又懶神秘!」





跟住佢就咬咗我隻手一啖,

「呀!」

我嗌咗一聲,令佢感覺我好似好痛咁,但實際上其實無乜感覺。

「點...點樣呀!?好痛呀?」

佢摸住我隻手好緊張咁望住我講,見到佢咁嘅樣,我都係忍唔住,笑住咁樣擺隻手係佢個頭上面,

「講笑咋,傻瓜。」

「哼!你呃我!唔理你!」





之後佢就擰轉咗塊臉,但我仲係見到佢臉上忍唔住嘅笑容,然後我再用隻手指篤一篤佢塊臉,

「偷笑嘅。」

之後佢擰返塊臉過嚟,

「哼!衰人!」

然後就將成個頭埋入我心口入面。

「但係你好鐘意衰人喎。」

我輕笑住咁講。

跟住佢就開始係我個心口磨嚟磨去,直至佢攰嗰陣先坐返好,然後我哋都好快就到站。





落咗車之後,我帶佢入咗一間書店,書店嘅入面有一個角落,可以比人安靜咁休息或者工作。

「原來你講嘅地方就係呢度...不過呢度都真係幾舒服。」,佢望一望四周環境。

「因為呢度好少人嚟,所以好靜好舒服。」

我哋搵個位坐低咗之後,就開始傾下計,

「我之前俾你嘅感覺,其實係咪唔係幾好。」,我摸一摸自己個頭,略有緊張咁講。

「傻啦...你之前一直都唔主動,其實我都知你一定係有原因嘅~」,佢直直望住我雙眼。

「點解咁講?」,我對佢嘅回答感到有啲突然。





「因為我覺得...你一直比某啲嘢困住咗。」

愛盈諗咗諗之後講。

「困住...其實我都唔知到底係咩,令到我好多嘢都好似變到唔太重要,好多感覺都唔太記得。」,我對眼前最信任嘅愛人,首次坦露心聲。

「因為你可能被規律侷限咗,做咩都要好有規律,令到自己反而對好多嘢都無興趣咁,例如...你每一日都要好早起身去煮早餐,雖然咁樣做係好好,但係我覺得咁樣做,生活反而會少咗啲變化,變得無咁有趣!」,佢努力咁諗例子嚟講。

聽到呢度,我就好似解開咗一個心結咁樣,感覺好似一間啲燈壞晒導致好黑嘅房咁,正當因為搵唔到解決方法而迷惘嗰陣,有排蠟燭突然燃點起嚟,令間房又重新光返。

「愛盈。」

「嗯?」,佢側一側頭。

「我愛你。」,我幸福咁微笑道。

「我都好愛你~」

我哋互相甜笑住咁講。

「不如...我同你講個故事。」,我突發奇想。

「好呀~」

「喺大概...五十年前,一個歐洲嘅某處,有一隻公貓係度到處流浪搵嘢食嗰陣,遇到咗一隻狗女,隻狗一見到隻貓,就係咁痴埋去同佢講嘢,但係隻貓好唔鍾意講嘢,所以完全無同狗女講任何一句嘢。
但係狗女無放棄到,一直跟住貓,一直同佢講嘢,終於有一日,隻貓比佢影響咗,漸漸開始會同佢傾計,而且仲愛上咗佢,佢哋兩個完全唔一樣嘅個體,就咁樣相愛咗。」

「但係有一日,有個人類突然捉走咗狗女,打算將佢當做寵物,而嗰個人一眼都無望過隻貓,就只係因為...佢係一隻黑貓。但係隻黑貓一直跟住個人類,甚至潛入咗佢屋企,可惜不足一個禮拜,人類就發現咗黑貓,正當人類好憤怒諗住殺死黑貓嘅時候,狗女保護咗佢,而黑貓親眼望住,佢最親愛嘅狗女係佢眼前被人殺死咗,但係狗女最後嘅遺言...係『生存落去』,所以黑貓逃走咗,但係佢逃走咗之後,成個腦都淨係諗到要幫佢報仇,可惜...佢啱啱出返嚟無幾耐,就被一班小朋友虐待,最後自己一個孤獨咁死去。」

我都唔知點解我會講呢個故事,但係我只係記得,呢個係我之前發過嘅一個惡夢,個夢嘅感覺好真實,但係最近我先再醒起,殺死狗女嘅嗰個男人,用嘅係...日本刀,而且上面都係寫住-DARKNESS

講完呢個故事之後,愛盈竟然開始係度喊,

「你...做乜喊呀...」

「嗚....你呢個故事...真係好淒慘啊...」

「傻瓜嚟嘅,故事嚟咋嘛。」

過咗五分鐘之後,愛盈終於都無再喊。

而佢又問咗我一個問題,

「希希,你相唔相信緣份啊?」

「我好相信,因為...就係緣份,我先會識到你,先會愛上你。」

「我覺得呢...緣份呢啲嘢,係一件好長久嘅事,影響住一個人嘅成世,每一分,每一秒,改變唔到,而且互相緊扣住。」

「你做乜突然講啲咁深奧嘅嘢嘅。」

我十分好奇咁問佢。

「因為...我覺得我哋嘅緣份,唔止一生一世...」

「我都係...咁覺得。」

我哋互相望住對方咁笑。

「唔錯唔錯...有靈感喇我。」

一道男聲從我身後傳來。