「大冒險...有咩比你玩好呢...」,阿龍望住天花板講。

「阿峰唔係有次話佢加咗個靚女ig咩,咁不如識下佢?」,我提議。

「就咁話啦!阿峰加油喇你!」,阿龍用力拍一下阿峰膊頭。

「嚟咪嚟...」,阿峰自信咁回答。

之後佢就攞咗部電話出嚟,撳入嗰個女仔嘅ig到,諗住dm佢,完全一片空白嘅對話紀錄一覽無遺。





我哋全部一齊望住阿峰同佢講嘅嘢會係咩,佢諗咗好耐之後,好似終於都諗到。

峰-hi~

全場望到之後都無嘢講,空氣好似結咗冰咁。

文清峰你真係唔識溝女架喎!」,阿龍無奈咁講,雖然佢同阿峰都係差唔多。

話說我好似唔記得講佢哋嘅全名,





龍就係王許龍,峰就啱啱講咗,而瑩瑩就係楊欣瑩。

少女-Hi

峰-仲記唔記得我?上次係街場見到果個呢。

少女-哦~我記得呀~好高嗰個呀嘛。

峰-係呢,唔知你叫咩名呢?





少女-我叫欣恩呀,個個都係咁叫我架。

峰-呢個名幾好聽喎,我叫阿峰呀。

「抄佢牌啦直接!」,阿龍忍唔住出聲。

「用咩理由呀,唔通直接講咩。」,阿峰皺眉回答。

「你部電話用ig傾計好食電,不如用whatsapp咁樣?」,我再次提議。

「唔錯喎,就咁話啦!」,阿峰笑一笑。

峰-係呢,我部電話用ig傾計會好食電,不如你比你電話我,我哋用whatsapp傾?

恩-(笑喊emoji)ok ar





跟住佢就send咗一串電話號碼出嚟,

呢個亂講出嚟嘅方法竟然真係得咗...

之後阿峰就一直掛住同欣恩傾計,仲要直到臨走前都仲傾緊,所以我哋都無繼續玩真心話,只係傾下閒計,佢哋就返咗去。

佢哋走咗之後,我哋就好似平時咁食飯,沖涼,瞓覺,好平凡咁過咗一個晚上。

第二朝起身,正當我諗住去煮早餐果陣,我見到,憶奇同憶雪瞓埋一齊,成個畫面嘅感覺十分温馨,令我忍唔住拎部電話出嚟影低佢,啲陽光照到入嚟,影到嘅畫面前所未有地溫暖,我直接拎咗嚟做wallpaper。

之後我哋一如既往咁食完早餐之後,當我原本諗住開Netflix嚟睇下嘅時候,愛盈突然同我講,

「不如我哋出去玩下?」





「去邊玩?海洋公園定迪迪尼?」

「我想去...我都唔知,嘻嘻,但係我想去...你平時會去嘅地方。」

「咁...我帶你去一個地方。」

「邊度?」,佢側一側頭問道。

「你去到咪知。」,我講完之後笑咗一笑。

「懶神秘!」,佢甜笑住咁講。