《突然有條女同我同居》(冇甜): 36

「幫忙？」

我充滿疑惑咁問返佢。

「其實呢...我開始咗寫故都有好長時間，但一直都無成功投到稿出書，我思考過文筆或者結構嘅問題，但係我已經將個故修改到可以出書嘅地步...但係都係出唔到書，啲出版社跟本就無理過我...畢竟我一啲人氣都冇...」

「出書...我有個方法，雖然佢哋要求唔低，但係我覺得可以試一試。」

「真係？」



佢充滿期望咁望住我。

「有機會緊係要試咗先，免得後悔。」

「明白！」

「咁....而家就上去。」

我拍一拍唔知幾時瞓着咗嘅愛盈。



「上去？」

雲零充滿疑問咁問我。

「出版社係樓上。」

「樓上？」

「我無講過咩？聽過係因為方便所以直接連住呀嘛。」



「但係直接上出版社....好似唔係幾好喎。」

「唔會，有個人長期都好得閒。」

盈：「行luu」

我哋同時企起身。

「嘩...你俾我想像中高...」

佢出奇咁同我講。

「打籃球。」

「明明我都有打開波....」



佢一邊嘆氣咁講。

之後我就帶佢哋上咗條樓梯，一推開樓梯門，就見到出版社，門外簡潔而有力咁寫住。

「眼鏡蛇出版社...我好似未見過咁嘅。」

「因為一直以黎出嘅書都無乜人氣。」

之後我就直接推開門入去，呢度都仲係咁乾淨，其實就係因為咁我先鐘意呢間出版社，正正就係因為佢所有嘢都好有條理同整潔。

入咗嚟之後，我禮貌性咁同辦公室嘅職員打下招呼，順便問下佢哋言姐係邊。

經過一輪嘅問候，言姐應該又係佢間房入面扮工緊....