《突然有條女同我同居》(冇甜): 37

我諗都無諗就推開咗言姐間房對門，只見佢一直凝視住個電腦螢幕，雖然望落好似係好認真咁做緊嘢，但以我所知，佢肯定係用連登追緊故。

因為佢睇到完全入曬神，而且係度偷笑緊,完完全全沉醉咗係自己個世界中。

「喂....」

佢聽到之後即刻嚇咗一嚇，然後望過嚟。

「你...你哋點解係度嘅....」



佢有啲驚訝咁樣問。

「無聊無嘢做，跟住係樓下見到佢，跟住就有嘢要做，所以就係度」,我將成個過程簡單咁解釋俾佢聽。

「會唔會精簡咗少少...不過其實我今日本來都打算去你度，仲有果位先生係...」

「你好，我叫滿雲零，我...上嚟係想出書。」,雲零直接咁講咗佢嘅目的出嚟,然後摸一摸自己後頸。

「哦～不過你應該都知...出書唔會係咁簡單架可。」,佢終於似返位編輯。



「係嘅。」,雲零認真咁回答。

「咁你有冇帶你個故嘅內容上嚟？」

「有,為咗以防萬一，我隨身都帶住影印本。」,雲零平淡咁講,感覺呢個行為就好似刷牙洗臉一樣平常。

竟然一早印好咗隨身帶住....睇嚟佢真係好渴望出書。

不過「渴望」同「能夠」唔同，渴望嘅嘢...無能力而且唔去行動嘅話有幾渴望都唔會得到，除非你俾上天眷顧住。



言姐拎到佢疊影印本之後，一臉輕鬆且自信咁講:

「你哋俾半粒鐘我睇曬佢」

跟住佢就請咗我哋出去。

「但...但係...我果疊嘢有成三十萬字架喎...」,雲零頭上冒出一堆問號。

「佢認真工作果陣效率好高，不過要好專心先得。」,我為佢解釋。

「估唔到....」,佢得知呢樣嘢之後嘅反應同我一樣。

「參觀下？」