因為屋企其實唔係好遠,只係隔咗兩三條街嘅關係,所以我哋行咗十幾分鐘就到,如果唔係沿途係咁打打鬧鬧嘅關係,原本以我本來嘅節奏可能五分鐘就行到,不過對住愛盈,我反而想行得越慢越好。

話咁快就上到去呢個熟悉嘅屋企,我拎條鎖匙出嚟就直接打開咗道門入去,只見我細佬係度睇緊電話。

愛盈見到佢就即刻行埋去望住佢:

「嘩~小朋友咁細個就玩電話呀,今年幾年級呀?」

我聽到之後盡力咁忍住笑意。





但見細佬用一個仇視嘅眼神望住我,然後托一托眼鏡,轉用鄙視嘅眼神望住愛盈。

「我今年中一...」

「佢由細到大都生唔高...哈哈」

結果我都係忍唔住笑佢,因為諗起佢中一都仲係矮過老母,而且老母仲要堅持送佢番學嘅畫面,真係幾得意...

「希,番到喇?過嚟幫手拎啲餸出去呀!」,老母嘅聲音從廚房傳出。





之後我就入咗廚房幫佢手。

「嘩!你高咗咁多嘅?!食咗咩藥嚟?!」,老母驚訝咁講。

「你都後生咗」

唔係講笑,佢個樣比起之前真係又後生咗,可能係因為少咗一個大麻煩,輕鬆咗好多嘅關係,而家望落比起我老母更似我家姐,得番一兩條皺紋,同埋佢嘅外貌同身高咁多年嚟都保持得好好。

「太得閒呀嘛~」





之後我就幫佢拎啲餸出去,一出到去就發現愛盈已經幫我哋set好咗枱。

「你眼光真係好」

老母滿意咁笑住講,而我只用一個淺笑回答佢。

呢餐住家飯,好快就食完,途中我發現原來愛盈同老母都幾好傾,而且老母望落都幾鐘意愛盈,睇嚟我嘅擔心都係多餘...

「希,過一過嚟。」

老母突然叫我出露台...