《突然有條女同我同居》(冇甜): 39

我望一望來電顯示，係老母打嚟。

點解呢一幕好似有啲似曾相識...

「喂？」

「喂？阿仔呀？今晚番一番嚟食飯呀！順便帶埋女朋友仔呀～」

「今晚...好呀，等陣，乜我有講過我有...」



「嘟嘟嘟嘟.....」

竟然直接cut我線...

「做乜呀希希？」

愛盈好好奇咁問。

「...我阿媽叫我哋今晚返去食飯。」



「好呀！auntie手勢肯定好好！」

「你....無啲緊張嘅感覺嘅咩？」

「無呀...點解會緊張呀？開心都嚟唔切啦～」

「咁就好....」

唔知點解我聽完之後會有種莫名嘅緊張感...因為唔知點解老母會知道我有女朋友，明明我冇同佢講過。



同埋就係現今社會嘅一個問題－中學時期拍拖通常好快分手。

通常都係當係小朋友玩下，雖然好少人講出嚟，但其實大部分嘅人都係咁諗，當然有啲情侶可以相愛好耐，甚至結到婚，但你可以睇下自己身邊嘅朋友，有幾多係拍拖拍咗好耐都仲相愛緊。

但係喺我眼前嘅呢個女仔，我會一直守護住佢，愛佢，直到我死都係，呢個係我嘅諾言，我係一個唔會反口嘅人。

我一路望住碌緊IG嘅愛盈一路諗。

「愛盈...」

佢聽到之後將目光移到我身上。

「嗯？」

我哋目光對視，然後我行前一步，緊緊咁攬住佢。



佢呆咗一呆，但好快就攬實我。

「我好愛你。」

佢聽到之後笑咗一笑。

「我都係～」

之後我用小小力，抱起咗佢，令佢可以望住我塊臉，而佢呢個時候塊臉已經越嚟越紅。

「快...快啲放我落嚟啦！有人架呢度！」

我望一望佢雙眼，諗咗一諗。



「就咁抱番屋企啦！」

「喂！」

佢又怕醜又笑住咁諗住扮惡。

「好啦好啦，今次放過你」

之後我就放返佢落地。

「嗚....你蝦我！」

佢鼓起塊面然後細細力咁錘我心口。

「好可愛....」



我笑住咁摸佢個頭。

打鬧咗一陣之後我望一望部電話，發現原来而家都六點幾。

「好喇，而家要過去喇。」

我拖起佢隻手講。

「好嘢！食飯飯～」

佢雀躍咁講，而且仲要玩疊字。

...心情都轉得幾快...