「愛盈。」,我望住佢雙眼。

「做乜呀?」,佢有啲呆。

「我哋上去。」

之後我就拖起佢隻手行出門口。

「上...上去?」



「天台。」

希望咁樣可以營造到浪漫嘅氣氛。

之後我哋就搭𨋢前往天台嘅樓層,話說呢度原来計埋天台都只係得十三層。

所以我哋都好快就上到去,呢度比我想像中大好多,仲要有個花園係度。

「所以...你帶我上嚟做乜?」



「聽講咁樣會浪漫啲呀嘛...」

其實我都係突然之間諗起可以咁做,因為我覺得兩個人坐係天台望月亮應該會幾浪漫。

係我仲諗緊可以係度做啲咩嘅時候,愛盈突然打斷咗我嘅思考。

「點解前面會有個紙箱係度嘅?」

佢疑惑咁望住前方講,因為有個紙箱擺咗係花園嘅入口,而且個紙箱仲要好大個。



唔係呀嘛....

「我...我哋行過去睇下先。」

一路行緊嘅同時,我個腦亦都一直係到默念入面嘅唔好係隻貓,雖然我係好鍾意貓,但係養貓嘅支出好大架,再養多隻嘅話我應該車都無錢搭...

點知行到淨番兩三米嘅距離個陣,箱入面突然出煙。

我哋即刻衝埋去,望入個紙箱,先發現...

入面係一個男人,而且手上拎住個杯麵。

見到佢嘅時候,我嘅第一反應竟然係「我無錢養一個麻甩佬」

...可能我已經開始有啲心理陰影。



果個男人見到我哋之後,就係個箱入面企起身,然後行出嚟。

只見佢係呢種天氣下竟然身穿背心短褲,而個樣望落都有三字頭,俾人一種滄桑嘅感覺。

「你好。」

佢伸出手打算同我握手。

「你好...請問你係到做乜。」

「我唔小心激嬲咗我老婆,跟住佢叫我聽朝先好翻去...」

佢摸一摸自己個頭尷尬咁講。



「咁你都幾...淒涼。」

「幾嘅...係呢我叫王戴肅,啲人都叫我大叔,你唔好見我個樣咁呀,其實我今年先三十咋。」

大叔...

「我叫葉正希,佢係黃愛盈...」

當我諗住講埋佢嗰陣,突然有把聲傳嚟。

「老公~我掛住你喇~」

跟住就有一位望落廿幾歲嘅清秀女性衝埋嚟攬住佢。

「老婆,我知錯喇,返去啦好冇?」



「好~」

跟住佢哋就準備離開,大叔臨走之前用一個單眼嘅神態對我舉起拇指,仲做咗個口型。

...求婚加油...?

佢係咪誤會咗啲咩...不過呢兩公婆都幾...恩愛。