我緊緊拖住佢隻手,慢慢咁行過去書店,但係竟然一轉彎,就見到一條好長嘅人龍,隊伍嘅中間有個直角位,現場應該大概四五十人到...

估唔到竟然有人早到過我咁多,我哋慢慢係旁邊行過去,入到書店之後言姐就即刻出嚟迎接我哋。

「希...黑貓先生~果然準時!請你坐低然後開始啦~」

佢扮到好似好認真咁同我哋講。

「咁我呢?」



愛盈輕輕咁扯一下我嘅衣袖,用明亮嘅雙眼望住我,好可愛咁問。

「你去旁邊睇下書?」

「好呀~」

跟住佢就以輕快嘅步伐行去書架果邊,安靜咁搵一本書嚟睇,而我亦都要乖乖坐低開始活動。

我對排係第一位嘅讀者示意,佢隨即行前拎出佢本書畀我。



「黑...黑貓先生!我由細睇你啲故睇到大架!」
 
眼前嘅男人...年齡應該係我嘅一倍…
 
「哈…哈哈…多謝…」
 
然後我將已經簽好咗名嘅書比翻佢,佢拎到就開始,之後用力咁索本書…
 
「嘩哈哈!我要拎翻屋企鑲起佢先得!多謝!」
 


奇怪…
 
跟住就到下一位讀者,
 
一位帶方框眼鏡,著住格仔衫,孭住一個大背囊,頭髮濕濕地嘅宅男上前。
 
「灰…灰丑先生!拜託你喇!」
 
佢係咪去錯地方…而且佢俾我嘅,只係一張硬卡紙…
 
「唔好意思…你要搵嘅人應該唔係到,我筆名係黑貓…」
 
我尷尬咁同佢解釋。
 
「咁呀,你求其簽個名啦。」


 
佢嘅聲線同頭先差天共地,臉上仲要掛住極度失望嘅表情,態度竟然轉變得咁快…
 
之後嘅讀者都好正常,冇再好似之前果幾個咁。
 
直到大概過咗廿個人,一個熟悉嘅人出現係我眼前...
 
「滿雲零?你咁得閒嘅…」
 
我望住文青風格嘅佢,有少少驚喜咁問佢。
 
「反正一陣間我都要上去,而且我本來都諗住黎…」
 
佢摸下自己頭髮,有啲尷尬咁講。
 


「多謝,你都加油!」
 
我望住眼前呢位…朋友,帶住淺淺嘅笑容咁同佢講。
 
「嗯!」
 
佢用一個微笑回答我。