跟住之後嘅讀者都冇乜特別,多數都係講句加油,或者問下我關於小說入面嘅問題。

「嗰個呢,嗰個廢柴最後溝唔溝喺ig識嘅女仔呀?」

「你遲啲就知。」

「個結局會係Happy ending定sad end呀?」

「我都唔知,隨時都有可能會變。」





始終都係要保持返啲神秘感,唔係嘅話會睇得冇樂趣。

眨下眼就到咗最後一位讀者,成個活動感覺都算係幾順利,應該....

我抬頭打算望下最後一位讀者,思考下洗唔洗比啲特別啲嘅嘢佢,不過諗諗下都係正經啲算…

眼前嘅呢位讀者,係一個清秀嘅女仔,身材修長,皮膚好白,應該都有一米六幾,有帶點啡色嘅長髮,容貌都幾可愛,同佢身穿嘅紅色衛衣,仲有黑色嘅修身長褲好襯,應該都吸引到唔少年輕嘅男仔,不過係我眼中都係及不上愛盈。

「唔…唔該曬喇!」





佢雙手遞出一本小說,有啲緊張咁講。

「唔洗。」

我接過小說之後望住佢擺出一個微笑,打算令佢唔好咁緊張。

之後我就好快咁簽完名,再係下面加多一句「從容面對」。

「多謝!」





佢講完之後就抱住本小說,急急腳咁離開。

最後一位讀者嘅離開,亦意味住今日嘅活動圓滿咁結束咗,我伸一伸懶腰,先感覺到隻手已經酸痛到好似俾嘢緊緊壓住咁樣。

執翻好張枱之後我就企起身去搵愛盈,只見佢竟然好難得咁認真睇書,雙耳戴住耳機,好寧靜,好靚…

我慢慢行去佢嘅身後,打算俾個驚喜佢,但係竟然俾我發現…

佢用本書嚟遮住自己部電話煲韓劇,仲以為佢會真係乖乖地咁睇書。

然後我就彎腰,係佢耳邊吹氣。

「嘩~!!」

佢嚇到彈起咗,然後塊臉紅曬,但又要扮嬲咁望住我。





「嚇死人咩!」

佢扮惡咁鬧我。

我淺笑,將手擺喺佢個頭上面。

「曳。」

佢聽到之後低一低頭,然後塊臉變得更加紅。

「咁...咁我突然就想睇下呀嘛!」

聽住佢嘅解釋,我微笑住咁望住佢,佢...係令我笑得最多嘅女仔。





睇嚟都可以提早計劃下,果樣嘢。

「走得喇~」

然後我就拖住佢起身,係臨走之前,我俾咗一張紙條老闆。請佢交俾零。

出到門口之後,我問愛盈,

「你爸爸媽媽得唔得閒?我想見下佢哋。」

「吓...吓?!」

跟住佢就打電話俾佢父母,而佢父母竟然好興奮咁叫我哋快啲過去,俾我想像中熱情...

「你做乜無啦啦想見家長嘅?」





愛盈側一側頭,疑惑咁問我。

...好傻。

「無,突然想見,你好似仲緊張過我咁嘅?」

「因...因為你太突然呀嘛!我都無諗過...」

我拖實佢隻手,十指緊扣,然後塊臉靠近去佢度,鼻貼鼻。

「有我係度,唔會驚。」

之後佢燦爛咁笑咗一下,





「嘻~行啦!」

「今次到你帶我」

我感受住佢手心傳來嘅溫暖,只想一生一世都可以咁,心中卻浮現中一個問題,我...做唔做到?

「無論如何,都要做到。」

我係心中默唸,然後同佢一齊上巴士。

...

同一時間,滿雲零滿意咁準備離開書店,但比老闆叫停,然後比咗一張紙條佢。

滿雲零睇完之後,用隻手摸亂自己嘅頭髮,然後拎出電話。

「果個𡃁仔...」

佢笑住咁講。

「恭喜...唔爭在俾埋我電話你:XXXX XXXX」