《突然有條女同我同居》(冇甜): 51

「嗱！」

愛盈係背後拎咗一盒嘢出嚟，我用雙手接過 ，仔細啲咁睇，係一盒包裝精緻嘅朱古力，個傻妹竟然就去嘥咁多錢買朱古力...

「我知道你係眾多甜嘢入面淨係鍾意食朱古力，所以就用佢嚟代替生日蛋糕啦！嘻～」

「...你點知？我好似無講過...」

「我日日都...呀唔係！我...我...我問咗阿龍呀嘛！」，佢有啲慌張咁講。



「真係？」，我靠近佢塊臉，差唔多鼻貼鼻，然後望實佢兩隻眼講。

「嗯嗯！你...快啲試下啦！」，佢移開視線講。

「...嗯」

之後我係盒入面求其拎咗一粒朱古力出嚟擺入口。

好甜....太甜喇...不過...幾好食...



「幾好食，係邊買？」

「我自己整㗎！」，佢燦爛咁笑住講。

「奇蹟...」

「嘻嘻...咁你要好好獎勵下我喇...」，佢成個人貼過嚟，用右手手指係我心口上面打轉。

我吞一吞口水，係佢頭頂輕輕咁敲一下，雙眼望住旁邊，壓抑住衝動咁講：



「...刷牙瞓覺」

「車...」，佢嘟起嘴咁講。

係佢準備離開果陣，我用右手輕輕咁抬起佢下巴，然後好似蜻蜓點水咁係佢嘴唇上面錫咗一下，佢本來白裡透紅嘅臉頰即刻變到好似番茄咁。

「得唔得...」，自己做完之後都有啲怕醜。

佢咬住下唇咁點頭，然後衝咗入廁所。

係佢刷牙嘅同時，我去咗欣賞係雲海之中偷走咗出嚟嘅缺月，諗返起啱啱返嚟果陣嘅一啲嘢...

...

我哋上咗車之後就去咗上層坐低，我同愛盈係左邊求其揀一行坐低咗，一坐好愛盈就開始瞓覺。



上層呢個時間除咗我同愛盈之外就淨係得一個人，而果個人就坐咗正正係我右邊靠窗嘅位置，佢係一個幾清秀嘅男仔，有種書卷氣息，雙眼一直凝視住佢用左手托住嘅Macbook螢幕，然後右手飛快咁敲打係鍵盤上敲打。

但係佢突然停低，我而家先睇到佢右手原來缺少咗一隻尾指。

「你已經望咗我有34秒，請問有咩事？」，佢用佢雙眼直視住我，眼神中帶有一種憂愁嘅感覺。

「無...無嘢...唔好意思。」

之後我就移開視線，拎部電話出嚟睇下故。

但係果個人...硬係好似有少少熟悉嘅感覺咁...

...



「喂喂～做乜係度發吽豆呀～」

愛盈將我從思考中抽離。

「冇...我去刷牙先...」

「我係床上面等你～」

愛盈用一個會引人誤會嘅語氣講。

「咳...聽日要返學，你快啲去瞓覺先」

「係～」