《突然有條女同我同居》(冇甜): 50

不知不覺，我同世伯一問一答咁就已經傾到六點幾，我發現我哋意外地好傾，雖然年紀差咗三十年，但竟然完全無代溝。

而伯母已經去咗煮飯，愛盈都好乖咁跟咗去幫手，真係温馨...

希望屋企仲有胃藥。

...

個半鐘之後，只見枱上全部菜色都係海鮮。



「嘩老婆，今晚咁豐富嘅，又蜆又蝦又生蠔嘅？唔通...」

「唔好亂諗啦！見...見係新鮮先買返啲咋嘛！」

佢哋兩個嘅感情睇嚟維繫得幾好，但愛盈一臉疑惑咁係我隔離聽住佢哋講嘢...

真係好傻,但傻得可愛。

不過係愛盈屋企食嘅呢餐飯，好似有種溫馨嘅感覺，明明只係簡簡單單一餐飯，四個人，但係個心，好溫暖...



食完飯臨走之際，伯母同世伯行埋嚟問我，

「阿希仔呀，啱啱聽小盈講，原來你今日生日呀？你有冇啲咩想要？auntie同uncle可以買俾你架！」

「係囉，uncle我有唔少錢，你開到聲我一定比到你架！」

有錢真係任性...

「唔洗喇，我有黃愛盈就夠。」



我搭住愛盈膊頭，將佢再拉近自己多啲。

「口花花...」，愛盈望住地下，塊臉泛紅，咬住唇咁講。

「後生仔總係特別識氹女朋友開心～」

伯母對住我哋講完之後睥一睥世伯。

「咁我哋返去喇，bye bye 媽咪，爸爸～」

「世伯，伯母，bye bye。」

我禮貌性咁向佢哋微笑點點頭

「嗯，下次再嚟食飯呀～」



伯母溫柔咁講。

然後我哋就用咗半個鐘返屋企。

...

沖完涼出到嚟之後，愛盈收埋啲嘢係背後，神神祕祕咁講：

「其實呢...我仲有嘢想俾你...」

我吞一吞口水，期待佢之後會拎出嚟嘅嘢。