《突然有條女同我同居》(冇甜): 53

「黑...黑貓先生...」，愛麗絲突然出現係我面前，頭望地下咁講。

「嗯？」，都係俾愛盈瞓多陣算。

「我真係完全估唔到黑貓先生原來同我同年，我本来以為你已經廿幾歲...」，佢抬起頭望住我，微笑住講。

「哦...其實你係學校都係唔好叫我筆名好啲，仲有其實唔使加先生...」

畢竟咁樣有啲尷尬。



「唔好意思...請問我可以點樣叫你好？」

呢個女仔會唔會太有禮貌...

「我叫葉正希，你可以叫我阿希或者希哥之類嗰啲...」，我最唔擅長就係自我介紹...

「好嘅！黑...希哥。」，佢露出一個燦爛嘅笑容。

「係呢...你有冇女朋友...」，愛麗絲咬一咬下唇，用一個奇怪嘅眼神望住我講。



「有。」，我講完之後指一指黃愛盈。

「哦...我...我都係去準備下一堂先...」

「嗯，你慢慢。」，我微笑住講。

之後佢就帶住一個失落嘅表情返位。

呢個女仔有種奇怪嘅感覺...



不知不覺就到咗放學嘅時間，只見愛麗絲一落堂就走咗。

「行喇黃愛盈。」，我執好咗書包之後拍拍佢個頭講。

「返屋企？」，佢好似一隻小動物咁，柔弱又可愛咁望住我。

「買餸。」

「好好好！我要食肉！」，佢興奮咁講。

「...你鐘意。」

「好閃呀！！！」，阿龍突然轉身望住我哋。

「嘻嘻...」，愛盈聽到之後怕醜咁望住地下。



「你個瑩瑩呢？」，我邊講邊企起身。

「佢今日排球隊練波～我等埋佢先走～」

「咁你慢慢，我哋要走先。」

「bye～」，佢揮揮手。

...

同一時間，愛麗絲去咗一個比較少人嘅地方，拎出電話輸入一串號碼。

兩分鐘後，一個全身衣物都係黑色，左眼戴住黑色眼罩嘅男人出現係佢隔離。



「你好慢呀京叔。」，愛麗絲雙手叉腰咁講。

「小姐呀...你唔好成日當我係交通工具啦...仲有我今年先廿四歲...」，京嘆一嘆氣之後講。

「求其啦,我好攰呀，快啲送我返去。」，愛麗絲好似一個大小姐咁講。

「係...」

京隨即啪一下手指，一陣黑風吹過，下一秒佢哋已經係一間別墅入面,到達後愛麗絲隨即急步行返入自己房。
...