《突然有條女同我同居》(冇甜): 54

夜晚食完飯之後，正當我打算去沖涼嗰陣，我留意到電視播緊嘅一個新聞。

「一名四十二歲陳姓男子於傍晚時分墮樓亡，警方喺死者所住單位中搵到一張紙條，上面寫住「惡魔的禮物」，相信死者只係崇拜邪教，警方認為死因無可疑。」

「好似有啲恐怖...」，愛盈攬住一個咕臣，皺住眉頭講。

「有我係度，無事。」，我行過去摸一摸愛盈個頭安慰佢。

沖完涼吹完頭之後，我就自己一個坐係客廳，憶奇突然跳上嚟坐係我隔離。



「做乜呀你，臉色無啦啦差咗咁多嘅。」，憶奇一邊洗臉一邊講。

「唔知...可能有啲攰，有少少頭痛啫。」，我撐出一個微笑同佢講。

啱啱係浴室差啲企唔穩冧低，明明本來仲好精神...

「咁咪早啲瞓囉～～」，佢打咗個喊露。

「憶雪呢？」



「佢係窗邊望緊月亮。」，佢講完之後就直接瞓低。

「學下人啦你...」

...佢竟然即刻瞓著咗。

不過我啱啱做過咩黎會無啦啦咁攰...

「希希～我眼瞓喇～」



愛盈突然將佢嘅下巴擺係我個頭上面，啱啱沖完涼嘅佢散發住一陣香味，打斷咗我思索。

「嗯，我一陣就入房瞓。」，我平穩嘅語氣講

個頭好痛...

「喂喂，你望下我」，佢嘅下巴離開咗我頭頂。

「嗯？」，我抬頭望向佢嘅方向，佢竟然...

突然錫咗落嚟...

「今朝唔記得咗，補返～嘻嘻～」

「瞓覺覺～瞓覺覺～」



佢一路講一路用輕快嘅步伐行入房。

見到佢天真嘅笑容，我嘅煩惱都好似因為佢而消失咗唔少。

「呼...瞓覺能醫百病。」

係我企起身之後，憶雪行埋嚟跳上梳化，望咗我一眼之後就瞓咗喺憶奇隔離。

「早抖。」，我輕聲咁同佢哋講，之後就返房瞓覺。

...

當我再次擘大眼，已經係朝早五點幾，我細細力咁移開愛盈唔知幾時搭咗係我條腰上面嘅左手，然後靜靜地落床，因為我七點先要叫佢起身。



琴晚冇發到惡夢，而且起身之後好似成身都充滿能量...

梳洗完之後我就去煮早餐，不過今日好似有啲凍...

搞掂曬啲嘢嘅時候已經七點，我好似平時咁入房叫醒愛盈，只見佢一路瞓一路係度啜手指。

「起身喇。」，我趴係佢側邊用氣音係佢耳邊講。

「嗯～」，佢縮一縮之後發出呢種聲，令我即刻彈返起身。

「咳...起身喇黃愛盈。」

然後佢就坐起身，捽一捽眼。

「刷牙食早餐。」



「好～～」，佢一邊打喊露一邊伸懶腰，又令我大飽眼福...

返到學校之後，我發現阿峰係我哋班房出面鬼鬼鼠鼠唔知做乜。

「做乜呀你？」，我拍一拍佢膊頭。

佢嚇咗一嚇，然後發現係我就鬆咗一口氣。

「𥄫女囉。」，佢用一個理所當然嘅語氣講。

「邊個？」

佢聽到之後指一指愛麗絲。



「等陣先，你之前唔係喺IG識咗個女仔咩？」

「佢有男朋友喇。」

「哦...」,應該答咩好...

「你返去搵你個愛盈啦你。」

之後我就被佢推返入班房。