《突然有條女同我同居》(冇甜): 57

朝早六點，我起身之後一直係度欣賞眼前呢位美人，流住口水嘅嘴角，毫無儀態嘅睡姿，緊緊攬住我，將我當做攬枕嘅雙手，真係可愛...

我向佢塊臉吹氣，終於成功令佢鬆開手，隻手自由返嘅感覺真係...痺...

我落床之後伸一伸懶腰，然後一如既往咁拉開窗簾。

今日個天會唔會太陰...而家已經開始落緊毛毛雨。

...本來仲諗住炒蛋，睇嚟都係整其他嘢算...



「今日無炒蛋嘅？」，愛盈坐低之後望住眼前嘅早餐講。

「落雨呀嘛。」，我用理所當然嘅語氣回答。

「哦～」，佢扮明咁講。

七點搭四我哋就出咗門口，因為呢種天氣通常會比較塞車。

「感覺今日會好悶呀...」，愛盈挨住我膊頭，鬱悶咁講。



「而且仲好凍...」，佢接住講。

「咁樣會唔會好啲。」，我用右手拉佢過嚟，咁樣抱住佢應該可以暖啲...

「好...好多人係度架。」，佢細聲咁講,塊臉越嚟越紅。

「咁就俾佢哋羨慕。」,我係佢耳邊細聲咁講。

「...嗯。」，佢放鬆咁回答。



之後我哋就一直保持住呢個姿勢，直到落車。

行去學校嘅果一段路，我一直都係愛盈嘅右邊，為咗令佢盡量唔好淋濕。

「點解咁凍都要返學架～」，愛盈伏係枱面，悶悶不落咁抱怨道。

「無計啦...」，我無奈咁摸住佢個頭。

「你哋真係無時無刻都咁恩愛...」，阿龍轉身望向我哋講。

「羨慕？」，我左手托住下巴問。

「幾架...」，阿龍望落有啲失落。

「鬧交？」



「...你點知架...」，阿龍語氣有啲驚訝。

「寫曬係塊臉到。」

「我都唔知點做好...」

「講嚟聽下。」

「我都唔知佢想點...明明我已經晚晚whatsapp佢，但係佢每次都淨係覆我幾隻字...」，佢越講越失落。

...咁樣係鬧交？

「你哋平時有冇兩個人獨處？」



「有...一兩次。」

完全唔似平時熱血又活躍嘅阿龍...

「嗯...一陣間佢一返到嚟你就即刻攬住佢。」

「吓？」，阿龍有啲不解。

「因為...痛...」，愛盈突然用力咁搣我。

「唔好聽佢講，其實螢螢佢只係怕醜，只要你平時主動咁同佢主動咁相處多啲就得架喇。」，愛盈溫柔咁講。

「竟然係阿嫂比較可靠...」

「不過，我會努力架喇！」，阿龍終於有返活力。



我望向愛盈，只見佢對住我甜笑。

「我都幫到手架～」，佢笑住咁講。

「嗯，好叻。」，我輕輕咁拍拍佢個頭。

「嘻～」，佢甜笑。